ilisimatusarneq
Pinngortitaleriffik umiarsuarmik nutaamik ujaasissaaq
Pinngortitaleriffiup umiarsuaataa ”Pâmiut”, pisoqalingaatsiarsimavoq. Taamaammaat umiarsuartaassaaq qanoq aningaasalersorneqassanersoq Pinngortitaleriffimmi aqutsisut misissuleruttorpaat.
Umiarsuaq 1971-imi sananeqarpoq Pinngortitaleriffiulli 1996-imi Royal Greenlandimit pisiaraa, pisiarinnginneranilu ”Pâmiut” attartuinnarsimangaluarlugu.
Aningaasaqarnermik nalunaajaat
- Umiarsuartaassap qanoq aningaasalersorneqarnissaa misissuleruttorparput. Aningaasaateqarfikkoortinneqarnissaa ilimanaateqanngilaq, taamaattoq arlalinnik periarfissaqarpoq aningaasaqarnermik misissuiffigisassatsinnik, Pinngortitaleriffiup pisortaa, Klaus Nygaard, Sermitsiaq.AG'mut oqarpoq.
Umiarsuaq sapaatip-akunneri pingasut amutsivimmeeqqaammerpoq ajoqusersimaneri suliaritissimallutik, qujanartumillu sillimmasiisarfiup tamanna akilersimavaa taamaasilluni nammineq taarsigassaq million affaanik akeqartoq Pinngortitaleriffiup kisiat akilertussanngorsimallugu.
Millionilikkuutaat
Klaus Nygaard paasissutissiivoq, umiarsuartaassaaq millionilikkuutaanik akeqarataannaasoq.
Umiarsuaq Pinngortitaleriffiup Kalaallit Nunaani imartaani aalisagaqassutsimik misissuinerani pingaaruteqarluinnartuuvoq. Pisassiisoqassatillugumi, katersat uumassusilerituut Namminersorlutik Oqartussanut qanoq amerlatigisunik innersuussuteqassanerlutik tunngavigisarpaat.