Wednesday, October 11, 2017 - 15:23

Pinngortitaleriffik: Kitaani raajartassat qaffanneqarlik

Assi.: Arkivfoto
Pinngortitaleriffiup siunnersuinermini aappaagu raajartassiissutit qaffanneqarnissaat innersuussutigaa.

- Kalaallit Nunaata kitaata imartaani raajat 105.000 tonsit angullugit pisarineqarsinnaapput.

NAFO (Northwest Atlantic Fisheries Organization) Kalaallit Nunaata kitaata imartaanni 2018-imut raajartassiissutigineqarsinnaasunik taama innersuussuteqarpoq, Tunumilu 2.000 tonsinik pisassiissutit allanngortinneqassanngitsut innersuutigineqarpoq.

Kalaallit Nunaata kitaata imartaani raajartassiissutigineqarsinnaasutut innersuussutit 2016-imut 90.000 tonsinut naatsorsorneqarsimanerinut sanilliullugit 17 procentimik qaffariaateqarput. 

Raajaqasstsimi siuariarneq
- Raajartassiissutigineqarsinnaasunik qaffaassuteqarnermi paasissutissat biologit misissuisarnerinit, raajarniartartut paasissutissaataannit kiisalu naatsorsuusiornernit pissarsiarineqartut raajaqassutsip siuariaateqarsimaneranik inerneqarnerannik tunngaveqarput, Pinngortitaleriffik tusagassiuutinut nalunaarummi allappoq.

Ilisimatusartartut Kalaallit Nunaata kitaata imartaani raajaqassuseq paasiniarlugu 2017-ip naajartornerani naatsorsuusiornerisa takutippaat piujuartitsiniarneq eqqarsaatigalugu peqassuseq maanna ajunngitsumik inissisimasoq. Raajat raajaqassutsip piujuartitsiniarnermik tunngaveqartumik iluaqutigineqarnissaa qulakkeerniarlugu peqassutsip annikinnerpaaffissaa qaangerlugu Nunatta Kitaata imartaani maanna amerlassuseqarput.

Biologit misissuinerat
- Raajaqassuseq naatsorsuusiornerit tunngavigalugit annertussusilerneqartarpoq. Naatsorsuusiornerni taamaattuni raajarniartartut pisarisartagaannit kisitsisit, biologit misissuisarnerini raajaqassutsip oqimaassusinngorlugu annertussusilerneqarnerinit kisitsisinik, raajarniat kalinnermi ataatsimi pisarisartagaasa annertussusiannut tunngassuteqartut kisitsisit kiisalu saarulliit raajanik nerisussatut naatsorsuutigineqartut amerlassusiat ilanngunneqartarpoq, Pinngortitaleriffik allappoq.

Tamakku aallaavigalugit NAFO´p aaliangerpaa pisassiissutigineqarsinnaasutut innersuussutigineqartoq 105.000 tonsinut inissinneqassasoq.

Tunup imartaani raajaqassuseq suli appasittumiittuarsinnarpoq, naak tappavani ukiuni arlaqalersuni annertugisassaanngitsumik raajarniartoqartaraluartoq. Taamaattumik tappavani raajarniarneq pillugu siunnersuineq allannguuteqanngilaq.

Seneste nyheder / Nutaarsiassat kingulliit