Piniartut Pituffik aqqusaartalernissaanik piumasaqartut

Avanersuarmi piniartut qaqugukkulluunniit Pituffik aqqusaarsinnaasariaqarpaat.

KNAPK-p siulittaasua Henrik Sandgreen isumaqarpoq. Taanna allakkani ammasuni, Nunanut allanut Naalakkersuisoq, Suka K. Frederiksen (S) Kalaallit Nunaata, Danmarkip USA-llu siunissami illersornissamut isumaqatigiissuteqalerpata tamatuma qulakkeerneqarnissaa kaammattuutigaa.

Silap allanngorariartuinnarnera ilutigalugu arlaannik aqqusaarfeqarsinnaaneq pisariaqarluinnartoq, Henrik Sandgreen tikkuaavoq.

- Avanersuarmi inuutissarsiornikkut periarfissat killeqarmata angallavimmi isorartoqisumi periarfissat atorluarniarneqarput. Sumiiffiup tunniussassarititai atorluarniarlugit Avanersuarmiut Kooqqunut (Kap Atholl) umimmanniartarput ilaatigut Moriusap eqqaanut aaffanniartarlutik, tamatumalu saniatigut Savissiviup Qaanaallu akornanni angalasoqartarluni, Henrik Sandgreenip oqaatigaa, najukkamilu innuttaasut Qaanaap Savissiviulli akornanni angalaartuartut tikkuarpai, tassanilu Pituffik kisimi aqqusaarneqarsinnaalluni.

Pissutsilli maannakkutut itsillugit Pituffimmut akunninniaraanni Base Commanderi siumut attavigineqaqqaartussaavoq, umiatsialeqqusaanngillat, pisiniarfiliarniarunillu MP-mik ilaqaqqaarlutik pisiniaqqusaapput, tamatumalu saniatigut orseqqusaanatik.

Pissutsit taamaattut Henrik Sandgreenip akuersaarsinnaanngilluinnarpai. Taassuma piumasaraa umiatsiat qimussillu killilersorneqaratik unissinnaanissaat. Umiatsiaarartummi orsersinnaasariaqarput inuilli pisiniarfinnut pisiniarsinnaasariaqarlutik.