Kujataa

Piniartoq: Aalisapilunnerup appat perlerartippai

Ukiuni 60-ni inuussutissarsiutigalugu kujataani piniartup qularinngilaa appat toquinnartut perlerlutik toqusimassasut

Ukiuni 60-ni piniartutut inuussutissarsiortup qularinngilaa appat nerisaasa pingaarutillit tammakarnerat aalisapilunnermik pissuteqartoq

Danmarkimi laboratoriami misissuinerit takutikkumaarpaat kujataani appat toquinnartut napparsimallutik perlerlutilluunniit toqusimanersut. 75-nik ukiulik Kristian Isaksen ukiuni 60-ni inuussutissarsiutigalugu piniartoq isumaqarpoq kilisalluni ammassanniarneq appat toqorarnerannut pissutaasoq.

Maannamut suli ilisimaqqissaarneqanngilaq appat qassit kujataani toquinnarsimanersut piniartunit aallaaneqanngikkaluarlutik. Piniartoq Kristian Isaksen, appat toquinnartut nassaarineqarfianni inuussutissarsiortuusoq, ukiorpassuarni aarleqquteqartarsimavoq taama pisoqarnissaanut.

- 1980-kkut ingerlanerannili mianersoqqussutigiuartarsimavara aalisariussuarnik tunumi ammassanniartoqartalernera. Ammassaat appat nerisaanni pingaaruteqarluinnarput aammalu siornatigut saarulliit pisarisakkatta aqajarui ammassannik ulikkaartarput taamattunilli naammattuuissaappugut. Qularinngilara appat perlerlutik toqusalersut ammassaat nerisaanni pingaaruteqarluinnartut tammakarmata, Kristian Isaksen Sermitsiaq.AG-mut oqaluttuarpoq.

Ammassaaruppoq
Tunumi 160.000 tonsinik ammassattoqarsinnaasoq inassutaavoq taakkulu Nunatta, Islandip Savalimmiullu avittussaavaat.

- Ammassappassuit suli suffinatik pisarineqartalerput tamannalu ikiliartuutigaat. Pinngortitaleriffik maanna angallatigissorsuugami kujataani ammassaqassutsimik misissuisariaqaraluarpoq. Maani najugaqartuusugut ammassaat ikileriarnerat malugereerparput. Alluitsup Paata eqqaa ammassaat suffinerisa nalaanni ammassappassuaqartarnikuugaluarpoq maannali iluatsitsinerinnakkut naammattoorsisalerpugut, Kristian Isaksen oqarpoq.

Taassuma aamma kisitsisitalersinnaanngilaa appat qassit missaanniittut toquinnarsimasut siumorneqarsimanersut.

- Appat toquinnarnikut arlallit saneqquttarpagut ilaallu avammut tissukartarsimassapput. Kisiannni appat ilaat kusanaratarput. Kisianni Alluitsup Paata eqqaa qimallugu ungasiartumukarluni appanik kusanartunik siumuiffissaavoq, Kristian Isaksen oqarpoq.

Uumasut nakorsaat aamma Pinngortitaleriffik appat toquinnartut misissorneqarneranni peqataapput. Appat misissugassat siulliit Danmarkimi laboratorianut nassiunneqareerput.

Powered by Labrador CMS