Piniarneq
Piniarnermut allagartat aalisarsinnaanermullu akuersissutit kommuninnut qinnutigineqartalissapput
Qinnuteqaatit sukkasuumik suliarineqartalissapput
Piniarnermut allagartat tuniunneqartarneri aamma sinerissap qanittuani umiatsiaarsorluni aalisarsinnaanermut akuersissuteqartarneq tamakkulu nutarterneqartarneri februaarip aallaqqaataa 2017 aallarnerfigalugu kommuninit isumagineqartalissapput. Aalisarnermut piniarnermullu naalakkersuisoqarfik nalunaaruteqarpoq.
Qinnuteqartullu qinnuteqaataat ingerlaannaq suliarineqartalissapput.
Piniarnermut allagartanik piniartut kommunerisami allaffiinut februaarip aallaqqaataanit 2017 saaffiginnillutik piniartalissapput.
Nunaqarfimmiullu nunaqarfimmi kommunip allaffianut saaffiginnillutik piniarnermut allagartamik imaluunniit umiatsiaararsorluni aalisarsinnaanermut akuersissummik pissarsiniartalissapput.
Aalisartut, piniartullu allagartanik nutarteriniartut imaluunniit qinnuteqarniartut, kommunerisami innuttaasunut sullissivinnut saaffginnittassapput, tassani sullineqarnissaq ingerlassammat.
Qarasaasiaq aqqutigalugu piniarnermut allagartamik sullissivik.gl-ikkut qinnuteqartoqarsinnaassaaq.
Sullissivik.gl aqqutigalugu piniarnermut allagartamik qinnuteqartup piniarnermut allagartassani nammineerluni printersinnaanngussavaa – akilersimaneranullu uppernarsaammik takussutissaqaleruni atoriaannanngussallugu.
Umiatsiaararsornermut akuersissut
Umiatsiaararsorlutik sinerissap qanittuani qaleralinniarnissamut, saarullinniarnissamut, nipisanniarnissamut kapisilinniarnissamullu akuersissuteqareersut, akuersissutip pigeriikkamik assinga ukiumi tulliuttumi atuuttussaq kommunerisaminnut saaffiginnillutik ingerlaannaq pisinnaalissavaat.
Qinnuteqartut akuersissummik ingerlaannaq tunineqarsinnaanngitsut immikkut ittumik akuerineqarnissaminnik ingerlaannaq qinnuteqarsinnaalissapput, taannalu kommunimiit erngerluni Aalisarnermut Piniarnermullu Naalakkersuisoqarfimmut nassiunneqartassaaq.