qinersineq
Pingasunut: Qinersiartortut siornarnit nikippallaanngitsut
Qinersivinnut sianeqattaapallannerup takutippaa siornamut sanilliullugu qinersiartortut amerlassusaat allanngorpallaarsimanngitsoq. Taamaattoq Qaanaarmiut 54 procentii nalunaaqutaq pingasunut taasereersimapput
Nuummi Inatsisartunut qinersisinnaasut 12.255-init taamaallaat 39,57 procentii nalunaaqutaq pingasunut qinersiartorsimasut, Qaanaami qinersisinnaasut 444-t 54 procentii pingasunut qinersiartorsimapput. Taamaakkaluartoq Qaanaami siorna qinersisinnaasut 60,64 procentit pingasunut qinersiartorsimapput.
Anorlilaarami qiianarlunilu. Immaqa taamaammat siornamut sanilliullugu ikinnerupput, Qaanaami qinersivimmit taama nassuiaapput.
Qaqortumi qinersisinnaasut 45,91 procentii qinersisimasut, Sisimiuni 41,25 procentit qinersiartorsimapput.
Avannaa Tunulu
Uummannami qinersisinnaasut 37,79 procentii pingasunut qinersisimasut, tassa 342-t qinersisimammata, taamaattoq Upernavimmi qinersiartortut amerlanerusimapput. Tassami Upernavimmi qinersisinnaasut 44 procentii nalunaaqutaq pingasunut qinersereersimammata.
Ittoqqortoormiuni, kitaanut sanilliullugu 2 tiiminik siulliusumi, 41,7 procentit qinersisimapput, taamaattorli Tunumi illoqarfiit pingaarnersaanni Tasiilami qinersisut ikinnerusimapput. Tasiilamimi nalunaaqutaq pingasunut taamaallaat 37,44 procentit qinersisimammata.