justitsområde
Pinerluuteqarsimasut utaqqisarnerat iliuuseqarfiginiarneqartoq
Folketingimi ilaasortat Doris Jakobsen Sara Olsvigillu inatsiseqarnermut ministeri ataatsimeeqatigereernerani isumalluarput
Kalaallit Folketingimut ilaasortaatitaat Doris Jakobsen Siumut Sara Olsvig Inuit Ataqatigiit inatsiseqarnermut ministeri Karen Hækkerup Socialidemokrati sisamanngornermi ataatsimeeqatigaat.
Ataatsimiinnermi nunatsinni inatsiseqarneq eqqartorpaat.
Tusagassiutinut nalunaaruteqarnerminni Kalaallit Nunaanni eqqartuussivimmut suliassiissutit 8.000-it missaanniittut utaqqisuutigineqarnerat iliuuseqarfiginiarneqalertoq aamma eqqartorsimagitsik nalunaarutigaat.
Eqqartuussivimmi suliassat ikilisinneqarnissaannut Folketingip ukiaanerani ataatsimiinnerani aningaasaliisoqarpoq, suliarlu ukiuni marlunni ingerlassasoq naatsorsuutigineqarluni.
Pinerluuteqarsimasut isertitsivimmut sivisuallaamik utaqqisanerat ataatsimiinnerminni aamma eqqartorpaat. Kangerlussuarmi isertitsiviugallartup matoqqatinneqarnera ministerip ilisimavaa, pisariaqartitsisoqalissappalli aammaqqikkumaartoq oqaatigalugu.
Iluarisimaarneqarpoq
Ataatsimiinneq pillugu Doris Jakobsen Siumut ima oqaaseqarpoq:
- Utaqqisut amerleriataarsinnaanerinut ministerip pilersaaruteqareernera nuannaarutigisupilussuuara. Suliassanngortitammi qaleriiaaginnalersimasut pinerluuteqarsimasunik inissiisarfinnut utaqqisunut nuuginnassallugit iluaqutissartaqanngilaq. Kiisami aaqqiissuteqartoqalernera ajunngilluinnarpoq.
Inuit Ataqatigiinnit Sara Olsvig ataatsimiinneq aamma angusaqarfiunerarpaa:
- Inatsisartut inatseqarnermut ataatsimiititaliaani ilaasortatut Nuummi pinerluuteqarsimasunut inissiisarfik pulaarparput, aamma Kulusummi isertitsivik siorna pulaarparput. Ukiut arlaqanngitsut qaangiuppata matoqqasumik inissiisarfiliortoqarnissaa nuannaarutigigaluarlugu Nunatsinni inissiisarfiit sinnerini pissutsinik aaqqinniagassaqartuarnera aamma erseqqissaatigaara.