inatsisit atuutsitaanerat
Pinerluttuliornerit ikiliartortut
Kalaallit Nunaanni pinerluttuliornerit ukiuni kingullerni annikilliartorpoq, taamatullu ingerlaneq aamma 2015-imi pivoq, politiit ukiumut kisitsisit atorlugit nassuiaasiorneranni tamanna atuarneqarsinnaavoq
Pinerluttulerinermut inatsimmut tunngasunik 2015-imi nalunaarutiginninnerit 4.100-t missaaniipput, tassaniipput toqutsinerit, nakuusernerit, kinguuaassiuutitigut kanngutsaatsuliornerit aamma tillinniarnerit.
Nalunaarutiginninnerit 2011-imi 5.100-t sinneqarsimapput. Ilorraap tungaanullu suli ingerlasoqarpoq, pinerluttuliortarnerit ikiliartormata. Kalaallit Nunaanni Politiit kisitsisit atorlugit nassuiaataanni saqqummiunneqaqqammersup tamanna takutippaa.
Atuaruk: Kalaallit Nunaanni toqutsisarnerit ikiliartortut
Neriulluarnartoq
- 2015-imi suliatta kisitsisinngorneri takugaanni neriulluarniarneq ajornanngilaq. Ukiumut siulianut sanilliullugu pinerlunnerit soorlu, persuttaanerit, toqutseriarnerit, ujajaanerit, tillinniarnerit tillinnerillu ikilisimapput. Pinerlunnerit taakku innuttaasunut toqqisisimanngitsitsilersarput, taamaattumillu Nunatsinni Politiinit nuannaarutigaarput tamakku ikiliartormata. Nunarpummi toqqissisimanarsiartuinnarmat, politimesteri Bjørn Tegner Bay tusagassiutinut nalunaarummi erseqqissaavoq.
Suli annertusoq
Inuttussusermut sanilliullugu missingersuinermi pinerluttariaartsit ilaat eqqarsaatigalugit, Kalaallit Nunaat suli qaffasissumik inissisimasoq, politimesterip naqissuserpaa. Tassani ilaatigut pineqarpoq, meeqqanut inuusuttunullu kinguaassiutitgut kanngutsaatsuliornerit.
Taamaattorli tassunga atatillugu 2015-imi unioqqutitsinerit ikileriarsimammata taassuma nuannaarutigaa.
2015-imi 31-eriarluni unioqqutitsisoqarpoq, ukiup siuliani 54-iusimallutik. Aamma 2013-imi meeqqanut inuusuttunullu kinguaassiutitigut kanngutsaatsuliornerit 70-ersuusimapput.
Appariarneq
Tassanilu pinerluttariaatsimi ikileriartoqarpoq, taanna inuiaqatigiit iluanni ajornartorsiutaavoq, aammalu Kalaallit Nunaanni pissutsit nunani allani eqqartorneqaraangata taaneqarajuttarpoq.
- Suli annertuallaamik nakuusernernik aamma pinngitsaaliilluni atoqateqarneq Kalaallit Nunaanni takussaavallaaqaaq. Sapaatip-akunnerisa naanerini pisarput. Angerlarsimaffinni pigajunnerusarput. Aamma pinerluuteqartup eqqugaasullu akornanni atassuteqarajuttarluni.
- Taamaattumik Kalaallit Nunaanni Politiit - isumaginninnermut suliaqartut peqatiginerullugit - pinaveersaartitsinermik ingerlataqassaagut, pinerluutit taamaattut uteqqinneqannginnissaat anguniarlugu. Taamaallaalli ilaqutariit paquminarunnaartitsinerisigut nipangiusimajunnaarnerisigullu taamaaliorsinnaavugut. Ataatsimut, oqartussat aamma innuttaasut akornanni toqqissisimanermik pilersitsisinnaavugut, Bjørn Tegner Bay oqarpoq.
Pineqaatissinneqarajuttut
Politimesterip aamma nuannaarutigaa, pinerluuteqartut amerlasuutigut politiit pineqaatissittarmatigit. Bjørn Tegner Bay naapertorlugu, Kalaallit Nunaanni inatsisitigut isumannaatsuuneq nukittunerulersippaa, eqqugaasut, ilaqutaasut, pinerluuteqartut aamma inuiaqatigiit sinnerisa takusinnaammassuk, pinerluuteqarneq pineqaatissiissutaasartoq - nunaqarfimmi imaluunniit illoqarfinni anginerusuni najugaqaraluaraanniluunniit.
Atuaruk: Politeeq peqquserlulluni soraarsitaasoq