Lukket anstalt

Pindip kalaallit paarnaarussat Danmarkimiitiinnarniarpai

Pinerluuteqarsimasunut inissiisarfiup Herstedvesterip ‘kalaallinut immikkoortortaaniittut’ Danmarkimiiginnaqqullugit pinngitsaalineqaratillu Nunatsinni pinerluuteqarsimasunut inissiisarfiit matoqqasut siullersaannut ukiut marluk qaangiuppata naammaasineqartussamut pinngitsaalillugit nuutsinneqassanngillat

Inatsisinik atuutsitsinermut ministeri Søren Pind (V)

Danskit inatsisinik atuutsitsinermut ministeriat Søren Pind (V) taama isumaqarpoq. Taanna inatsisissatut siunnersuummik saqqummiussiniarpoq, kalaallit Herstedvesterimi inissinneqartussatut pineqaatissinneqarsimasut Danmarkimiiginnarusunnerlutik imaluunniit Nunatsinnut uterusunnerlutik nammineerlutik aalajangiinissaannut periarfissinniarlugit.

- Pinerluuteqarsimasunut inissiisarfittaassamut atatillugu isornartorsiuinerit maannamut tusarsimasagut akueraagut, pineqaatissinneqarsimasullu naleqquttumik inissinneqarnissaat inatsisissatut siunnersuuteqarnitsigut aqqutissiuutissavarput, danskit inatsisinik atuutitsinermut ministeriat Søren Pind (V) nittartakkamut Altingetimut taama allappoq.

Atuaruk: Pineqaatissinneqartut qaqugu iperagaassanerlutik naluaat

Suli aperinngitsoq
Nutaarsiassarlu taanna Nunatsinni Pinerluttunik isumaginnittoqarfimmi pisortap tunualersup Hans Jørgen Engbop nuannaarutigaa.

- Inuit pinngitsaalillugit Herstedvesteriliartissinnarlugit, ukiullu arlallit tassaniitissinnarlugit kissaatiginngisaannik allamut pinngitsaalillugit nuutsinneqarnissaat pissusissamisuunngilluinnarpoq, Hans Jørgen Engbo Altingetimut oqarpoq.

Atuaruk: Isertitsivinnut aningaasartuutit amerlanerulernissaat ujartorneqartoq

Qassillu Nunatsinnut uterusunnersut Hans Jørgen Engbop oqaatigiuminaatsippaa.

- Suli aperineqanngillat. Arlallilli Danmarkimiiginnarusullutik oqaatigisimagaat tusarpara. Affaasa Nunatsinnukarnissaat, affaasalu Danmarkimiiginnarnissaat ilimagaarput. Sunik atugassaqartinneqassanersut apeqqutaassaaq, Altingetimut taama oqarpoq.

Folketingimit suliarineqartussaq
Atugassarititaasut pineqartut ilaatigut tassaapput Nuummi pinerluuteqarsimasunut inissiisarfittaassami sunik sammisassaqartitsisoqassanersoq aamma sutigut tapersersuinermik neqerooruteqartoqassanersoq. Aamma pulaartoqarnissamut immikkut ittumik aaqqissuussisoqassanersoq apeqqutaassaaq, qanigisaasut pineqaatissinneqarsimasullu anigallarnissamut akuersissuteqartut tikeraarnerminnut atatillugu angalanerminnut akiliunneqartarlutik.

Inatsisissatut siunnersuutissaq Kalaallit Nunaanni pinerluttulerinermi inatsisip allanngortinnissaanik imaqassaaq, tamannalu Inatsisartunit akuerineqaqqaartussaassalluni.

Tamanna pereerpat aatsaat Folketingimi suliarineqarsinnaavoq.

Atuaruk: Kalaallit Herstedvesterimi parnaarussat aatsaat taama amerlatigilersut

Powered by Labrador CMS