misigisaq

Pilunnguaq issittumi ilisimasassarsioqataalersoq

Kullorsuarmiu 15-inik ukiulik Pilunnguaq Karlsen ukioq manna ilisimasassarsiornermut Students on Icemut sisamanngorpat aallartittussamut Kalaallit Nunaannit peqataasussatut toqqarneqarpoq

- Angalanissannut qilanaartupilussuuvunga. Ilinniaqqinnissannut atorsinnaasannik nutaanik misigisaqarlungalu ilisimasaqalernissara naatsorsuutigaara. Aamma inuusuttoqatinnik kammalaatitaartornissaq qilanaarisupilussuuara, Pilunnguaq Karlsen 9. klassimi naammasseqqammersoq taama oqarpoq.

Pinngortitaq pillugu nunarsuaq tamakkerlugu suliniaqatigiiffik WWF legatimik tunissuteqartuuvoq, taannalu Students on Icemut peqataasussanik toqqaasartoqatigiinnit Pilunnguaq Karlsenimut tunniunneqarpoq.

Taanna ilinniartut nunarsuarmit nunanit assigiinngitsuneersut immikkut toqqakkat 100-t peqatigalugit Issittumi angalasussanngorpoq. Aamma ilisimatuut, eqqumiitsuliortut, atuakkiortut, nipilersortartut ilinniartitsisullu angalaqataassapput.

Silap pissusiata allanngoriartornera soqutigigaa
Ukioq manna ilisimasassarsiorneq juulip 21-ani aallartissaaq aggustillu tallimaani naammassineqarluni. Ilisimasassarsioqatigiit Canadami illoqarfimmi Ottawami piareersaqatigiiffigisassaminni naapissapput. Tassaniissinnarlutik Quebecimi illoqarfimmut Kuujjualiassapput, ilisimasassarsiortullu umiarsuaat M/V Ocean Endeavor tassanngaanniit aallassaaq.

Canadap nunaqarfiinut, kangerluinut Baffin Islandillu sineriaatigut angalasoqassaaq, ilaatigut alianaatsorsuaq Auyuittuq National Park tikinneqassalluni. Tamanna pereerpat umiarsuup Ikersuaq Davis ikaassavaa, Ilulissat aamma Itilleq tikinneqassallutik.

Inuusuttut Issittup pinngortitaani angalasinnerisigut silap pissusiata allanngoriartorneranik ilimasaqalernissaannik ilisimasassarsiorluni angalaneq siunertaqarpoq. Tamannalu Pilunnguup soqutigisarivaa:

- Silap pissusiata allanngoriartornera avatangiisillu soqutigisupilussuuaakka. Atuariartoraangama assiliisarama. Taava takusinnaavara maani Kullorsuarmi allanngortoqartoq. Sikup sinaava allanngorluni ungasinnerulerpoq, aamma aputaarutiaarnerusalerpoq. Aamma soorlu niviukkat oktobarimi-novembarimi toquusartartut maanna toquusarnatik ukioq naallugu takussaasarput, Pilunnguaq Karlsen oqaluttuarpoq.

Sinniisoq
Taanna ukioq manna ilisimasassarsiornermi Kalaallit Nunaannit peqataasussat pingasuusut ilagaat, nunamilu sinniisuuffiginissaanut qilanaarpoq:

- Inuusuttoqatikka sinnerlugit Nunatta nunarsuarmioqatitsinnut oqaluttuarinissaa maanilu inooriaasitta oqaluttuarinissaa qilanaarivara, Pilunnguaq Karlsen oqarpoq, angerlarunilu Kullorsuarmioqatimi ilisimalikkaminik avitseqatiginissaat aamma qilanaarinerarpaa.

Ukioq manna issittumi ilisimasassarsiorneq uani malittarineqarsinnaavoq: studentsonice.com

Powered by Labrador CMS