takornarialerineq
Pilersitsisoq: Kalaallit Nunaanni periarfissiissutit nittarsaalluarneqartariaqarput
Ilulissani, Kangerlussuarmi, Nuummi, Narsarsuarmi Tasiilamilu angalanissamut periarfissiissut 5.000-nik ilaaffigineqarsinnaasoq pisiarineqarsinnaalerpoq
Qulimiguulimmik ilaallutit Ilulissat eqqaanni mittoqarsinnaalerpoq, aamma Sermiliup eqqaani Tasiilamiittumi angalasoqarsinnaalerpoq.
Nittartagaq Heliarctic.dk taamatut neqerooruteqarpoq, taanna sisamanngormat atuutilerpoq.
Ilulissani, Kangerlussuarmi, Nuummi, Narsarsuarmi Tasiilamilu angalanissamut periarfissiissut 5.000-nik ilaaffigineqarsinnaasoq pisiarineqarsinnaalerpoq.
- Kalaallit Nunaanni takornariat amerlanerusunik periarfissaqarsinnaasariaqarput. Takornarissat angalalinnginnerminni inniminniisinnaasariaqarput. Qulimiguulimmik angalanerinnarmiinngitsoq kisianni aamma qimussinik angallassinerit assigisaallu nittartakkakkut inniminniissutigineqarsinnaasariaqarput, Martin Kristensen Sermitsiaq.AG-mut oqarpoq.
Heliarctic.dk Kalaallit Nunaanni angalatitsivinnik suleqateqarniarpoq soorlu Visit Greenland suleqatigineqalereersoq.
Angalanerit misigisaqarfiusut
Martin Kristensen Hawaiimiinnermini ukiut pingasut matuma siorna isumassarsivoq.
- Qulimiguulinnik angallasseqattaartoqaannavippoq. Tassani eqqarsarpunga aamma Kalaallit Nunaanni periarfissiissutit assingusariaqartut.
Kalaallit Nunaanni angallassisarnerit misigisaqartitsilluartartut oqaatigaa.
- Sermersuakkut angalaneq misigisassaavoq imaannaanngitsoq, nunarsutsinnimi allanik taamatut periarfissiisoqarsinnaanngilaq. Angallassinerimmi Grand Canyonitummi assersuunneqarsinnaapput, Martin Kristensen oqarpoq.
Heliarctic.dk-p Air Greenland suleqatigaa. Ilulissani, Kangerlussuarmi Nuummilu qulimiguullit attartorneqartarput. Tasiilami BackBone Aviation atorneqartarput kiisalu Greenland Copter Kangerlussuarmi atorneqartarlutik.