Pikkorissut KangNu Running Race Nuummi pimmat ajugaapput

Sisoraatinik oqilaniuttartut Martin Møller aamma Niviaq Chemnitz Berthelsen nunakkut arpannermi KangNu Running Racemi takinermut 35 kilometeriusumut ajugaapput. Taakku timersortartut pikkorissut qaninnertut unammillertiminnit siulliungaatsiarlutik apuupput anorerlunilu siallilillattaagaluartoq arpattoqarmat.

KangNu Running Racemi isorartussutsini tamaginni katillugit peqataasut 225-upput taakkulu Kangerluarsunnguami aallariarlutik Nuummi arsaaffiup eqqaani NUIFip illuata silataanut apuukkiartortarput.

Angutit arnallu 35 kilometerimut aamma 20 kilometerimut arpapput. Tassani Martin Møllerip 35 kilometerimut akunnerit pingasut minutsillu 42-ut atorsimavai tullersortaata Thure Baastrupip akunnerit sisamat minutsillu 44-ut atorsimagai. Hans Brummerstedt pingajuuvoq akunnerit tallimat minutsillu pingasut atorsimallugit.

Nunanit allanit peqataasut
35 kilometerimut arnani Niviaq Chemnitz Berthelsen ajugaavoq atorsimallugit akunnerit sisamat minutsillu 46-ut tullersortaata Miiti Lyngep akunnerit tallimat minutsillu 41-ut atorsimagai. Nina Josefsen pingajuuvoq akunnerit arfinillit minutsillu 30-it atorsimallugit.

Siornamut sanilliullugu peqataasut 13-nik amerlanerupput Ilulissaniit, Sisimiuniit Maniitsumiillu peqataasoqarluni. Aaqqissuisut aamma nalunaarput nunanit allanit peqataasoqartoq. Taakku Danmarkimiit, Brasiliamiit, Polenimiit, Norge-miit, Sverigemiit aamma USA-miit aggersuupput.

- Ikiuuttussat ikiueqqaarnermut pikkorissarneq piumasaqaataasoq naammassivaat, aammattaaq ikiuuttut arpattartuusut nunakkut arpannermik misilittagaqarluartuullutik, aaqqissuisut sinnerlugit NUIFimi inuusuttuaqqallu ornittagaanni Allermi pisortaq Rasmine Geisler nalunaarpoq.

Peqataasussat amerlanerpaaffissaat 225-nut killilerneqarpoq angallatini allarfissamukaassisussani inissat pissutigalugit.

Aajuku siulliit pingasut inissitsiterneri:
35 kilometer angutit:
1. Martin Møller 3,42 timer
2. Thure Baastrup 4.44,39 timer
3. Hans Brummerstedt 5.03,17 timer

35 kilometer arnat:
1. Niviaq Chemnitz Berthelsen 4.46,09 timer
2. Miiti Lynge 5.41,36 timer
3. Nina Josefsen 6.30,26 timer

20 kilometer angutit:
1. Michael Clasen 1.40,10 timer
2. Erik Amondsen 1.46,06 timer
3. Anton M. Petersen 1.47,03 timer

20 kilometer arnat:
1. Regine Møller 2.03,08 timer
2. Jeanette Petersen 2.04,35 timer
3. Elsennguaq Silassen 2.08,37 timer

Sermitsiaq.AG-mi assinik pissarsinissarput suli utaqqivarput.