Hudson Greenland

Piiaaffimmut isumaqatigiissut atsiorneqarpoq

Qaqortorsuarmi suliniummut atuinissamik isumaqatigiissut IBA-millu isumaqatigiissut Nuummi Sisimiunili atsiorneqarput

Naalakkersuisut aatsitassarsioqatigiiffiullu Hudson Greenlandip isumaqatigiissutit sisamanngormat atsiorpaat

Ullumi sisamanngornermi persuarsiornikkut canadamiut aatsitassarsioqatigiiffiat Hudson Resources taassumalu nunatsinni immikkoortoqarfia Hudson Greenland akuersissummik tunineqarput, taamaasilluni anorthosit-imik piiaasinnaalerluni.

Anorthosit, Sisimiut Kangerlussuullu akornanni Qaqortorsuarmi, aamma White Mountainimik taaneqartartumi, piiarneqartussaq glasfiberimik tunisassiornermi atorneqassaaq.

– Nuannaarutigaara ullumikkut maaniissinnaagama, Hudson Greenlandimi siulersuisunut ilaasortaq James K. Cambon Sisimiuni aatsitassanut ilinniarfimmi oqarpoq.

Atsiuinerit Nuummi Sisimiunilu ataatsikkut ingerlanneqarput. Sisimiuni persuarsiorneq ingerlanneqarpoq aatsitassanut ilinniarfimmi, tassani sulisut ilinniartullu niaqorornaveeqqutillit sulisartullu atisaannik atortut katersuussimasut isiginnaartuliullugit Hudson Greenlandip illoqarfiullu borgmesteriata Hermann Berthelsenip (S) isumaqatigiissutit atsiorlugit.

Tikeraartuinnaavugut

– Tununniipput aatsitassanik ilinniarfimmi ilinniartut, neriuppugullu ullut ilaanni atorfinitsikkumaarlutigit, James K. Cambon Kalaallit Nunaannut qujamasulluni oqarpoq.

– Maanna ukiuni qulini maani sulereersimagaluarluta nalunngilarput tikeraartuinnaalluta, tikeraaginnartullu pinngortitaq inuillu pisassavagut.

Niuernermut Naalakkersuisoq Vittus Qujaukitsoq aamma qujassuteqarppoq.

Naatsorsuutigineqarpoq suliniut sanaartornerup ingerlatsinerullu nalaanni Qeqqata Kommuniani suliffippaalunnik pilersitsissasoq.

– Isumaqatigiissutini illua'tungeriit tamaasa sulisimanerat pillugu qutsavigerusuppakka. Hudson isumaqatigiissutit atsiorneqarnissaannut ilisimasalittut sulisimavoq, Qujaukitsoq itisiliivoq.

Qilanaarnerup nuannersua

Piiaaffissaq suli sananeqanngilaq, siusinnerusukkullu namminersorlutik oqartussat tusagassiortunik katersortitsisarfianni aatsitassanik suliniutinik anguniagalinnik, suli aallartinneqaqqajanngitsunik, taamatut persuarsiortumik atsioqatigiittoqartarsimavoq.

Nunatsinnili illoqarfiit annersaasa tullianit Hudson mannalu tikillugu ingerlatai nersualaarneqearput.

– Hudson Greenland ukiuni arlalinni ilisimasimavarput. Kangerlussuup eqqaani diamantinik aatsitassanillu qaqutigoortunik ujarlersimavoq. Qujanartumik diamantinik nassaannginnamik tunniutiinnanngillat, diamantimmi kisimik isumalluutissaanngillat, borgmesteri Siumumeersoq qungujulluni eqqaamannippoq.

Atsiuinermi nipit eqqissisimasut

– Angutit ilaasa diamantit nuliaminnut milluutigiinnartarpaat.

Taamaasilluni Hermann Berthelsenip persuarsiornermi najuuttut ataatsimut illartippai.

Taamaakkaluartoq saqqummiussinerup ilarujussuani persuarsiortoqarpoq.

– Uagutsinnut pingaaruteqarpoq piiaaffiup taassuma naleqassusia Sisimiunuinnaq, Kangerlussuarmuinnaq Maniitsumuinnarlu iluaqutaassanngitsoq aammattaarli kommunimi sumiiffinnut mikinerusunut iluaqutaassasoq, Berthelsen oqarpoq.

Nalunaaqutaq 15:35 akuersissutit taakkua marluk Nuummi Sisimiunilu atsiorneqarput.

Powered by Labrador CMS