akiliisinnaajunnaarneq
Piginneqataasup rubinisiorfik suli upperaa
Namminersorlutik Oqartussanit pigineqartoq Greenland Venture akiliisinnaajunnaarnerup kingorna aaqqiissuteqapallattoqarnissaanik neriuuteqarpoq
True North Gems Greenlandip akiliisinnaajunnaarluni nalunaaruteqarnerata kingorna, ingerlatseqatigiiffimmik piginnittut ilaat, Namminersorlutik Oqartussanit pigineqartoq Greenland Venture, rubinisiorfiup siunissaa qulakkeerniarlugu maanna tamaviaarpoq.
Aammalu kalaallinit piginneqataaffigineqaannarnissaa annertusarnissaaluunniit qulakkeerniarlugu. Piginneqataasoq taama ilisimatitsivoq.
Atuaruk: Akiliisinnaajunnaarnerup kingorna: Nutaanik aningaasaliisussanik pissarsiniarsarisut
Uggornartoq
- Uggornaraluaqaaq pilersitsiniarluni suliniuteqarsimasup tunniutiinnartariaqalersimanera, kisiannili rubinisiorfik suli pilersaarutaavoq pitsaasoq uagullu pingaartinnerpaavarput ingerlaqqiinnarnissaa selskabinngorluni qajannaatsoq, Greenland Venturemi pisortaq, Karsten Høy, tusagassiuutinut nalunaarummi oqarpoq.
Greenland Venture TNGG-mi 7 procentimik piginneqaataagaluarpoq.
- Pilersaarut suli upperilluinnarparput nukinnillu massakkut nutaamik ilusilerlugu ingerlaqqeriarnissaanut atuisut upperaagut sukkasuumik aaqqiissutissamik nassaarumaartut rubinisiorfiup pijaalersinnaanera qulakkeerniarlugu, taanna oqarpoq.
Suleqataalluinnartut
Akiliisinnaajunnaartup akisussaasua peqatigalugu Greenland Venture ingerlaqqeriarnissamut suliniartunut suleqataalluinnartunut ilaavoq.
- Qilanaaraarpugut allat suleqatigilluinnarlugit - minerunngitsumik maannakkumut piginneqataasimasoq suleqataasimasorlu, LNS - rubinissiorfiup aningaasarsiorluarsinnaasunngortinnissaanut aningaasaliisunut, sulissuteqarpoq kalaallillu nunaannut iluaqutaasussamik sulinermi ingerlateqqinnassaanut, Karsten Høy oqarpoq.