piginneqataassutit
Piginneqataassutit nalinginik eqqoriaassagaanni piffissaqarluartariaqarpoq
Grønlandsbankenip unammisitsinerani aktiespilimi siusinnerusukkut ajugaasarsimasoq piffissaasuanini tunngavigalugu ukioq manna normu 99-itut inissisimavoq
Piffissaq aningaasanik naleqarpoq, oqariartaasitoqaq taama nipeqarpoq.
Grønlandsbankenimilu piginneqataassutinik nioqquteqarnermik unammisitsinermi, AktieTipsimi, unammisartutoqqat ilaata, John Mougaardip Nanortalimmeersup, tamatuma ilumoortuunera nassuerutigisariaqalerpoq. Pingaartumik piginneqataassutit nalingisa qanoq ineriartornerannik malinnaanissaq eqqarsaatigalugu.
John Mougaard unammisitsinermi 2012-imi 2013-imi ajugaavoq, maannakkorpiarli normu 99-itut inissisimalluni. Taamalu pisoqarneranut nassuiaataa paasiuminarpoq.
- Ajugaarusukkaanni suliffeqarfiit piginneqataassutaannik malinnaanermut piffissarujussuaq atortariaqarpoq. Ukioq mannalu piffissamik sivisuumik atuinngilanga. Tamatumunnga taarsiullugu najoqqutassarsiorani periuseq, unammisitsinermi nalunaaqutsersuiinnarfiusoq, ukioq manna misilikkaluarpara. Periuserli taanna ajugaarusukkaanni atorsinnaanngilaq, John Mougaard illariarujussuarluni oqarpoq.
Unammisartutoqqap tamatuma saniatigut nammineq piginneqataassutinik pigisaqarsimanini tikkuarpaa, taakkuali maanna tunisimanerarlugit. Taamaattumik piginneqataassutinik niuerfinni qanoq ineriartortoqarnera malinnaaffigissallugu pissusissamisoorunnaarsimavoq.
- Siornatigut malinnaanermut ullormut akunnerup ataatsip atornissaa pissusissamisoorluinnarsimavoq, piginneqataassutinik unammisitsisoqarnersoq apeqqutaatinnagu, John Mougaard oqarpoq.
Atuaruk: Aningaasanik niueruteqartarfinni siulittuisartut
Aningaasanngorlugit akissarsiassat
Grønlandsbankenip ukiumoortumik unammisitsinera aktiespil marsip 2-ani aallartippoq. Aningaaseriviullu ukioq manna ilinniartut aningaasaliinernik, piginneqataassutit nalinginik iluanaarutisiassanillu – kiisalu silarsuarmi tassani oqariartaatsinik allanik tamanik – soqutiginnilersinnissaat immikkut pingaartippaa.
Grønlandsbankenip ukioq manna akissarsiassiissutigisaanit 25.000 koruuniusunit 17.000 koruunit atuaqatigiiaanut ilinniartoqatigiinnulluunniit ingerlalluarnerpaasunut akissarsiassatut siullertut, aappaattut pingajuattullu tunniunneqassapput.
Grønlandsbankenip aktiespillet 13-issaannik aaqqissuuppaa. AktieTipsilu pisarneq malillugu Sermitsiaq suleqatigalugu ingerlanneqarpoq.
Aningaaserivit ingerlatamut tunuliaqutaavoq pappiaranik nalilinnik tamakkununnga aningaasaliisarnermik soqutiginninneq ilisimasaqarnerlu annertusarniarlugit.
Unammitsineq marsip 27-ani naavoq, Sermitsiaq normu 14-imi takujuk kikkut unammisitsinermi ajugaanersut.
Aviisi uani pisiarisinnaavat: