Århus
Pigiliutiinnakkamik isumaqarfigineqartut
Århusimi ilinniagaqartut arfinillit qallunaanik qallunaallu kulturiannik naapitsinertik oqaluttuaraat
Ilinniagaqartut arfinillit, Anne Katrine Aarsethip, Martha Noahsenip, Aviaja Sørensenip, Henrik E. Lyberthip, Pipaluk Løvstrøm Kleemannip aamma Najannguaq Sørensenip ilisaritinneqarnerat Aarhusportalen.dk-mi tamanut saqqummiunneqarpoq.
Naatsorsuutigisat
Kalaallit inuusuttut naatsorsuutigisat isummallu pigiliutiinnakkat oqaluttuaraat. Inuiattut allaanerusutut mattusimaneq maqaasinerlu. Aammattaarli angisuumik sinnattut, anguniakkat, Danmarkimut Kalaallit Nunaannullu asanninneq. Minnerunngitsumillu siunissamut neriuuterpassuit.
Martha Noahsenip, Sisimiuneersup, allaaserisami ilaatigut oqaluttuaraa qoqassissutigisimallugu kalaallit pigiliutiinnakkamik assigiissumik isigineqartut. Kalaallit tamarmik imerajuttuusut inuuneqarnerluttuusullu.
Tamarmik inuuneqarnerluttuunngillat
– Inuit aalajangersimasuinnaat inuuneqarnerluttuupput, kalaallit tamarmiunngitsoq. Meeqqat atuarfianni atuartut 20-usimavugut. Immaqa pingasut-sisamat atugarliortuupput, sinneri uattut ittuullutik. Paasisinnaanngilara inuit isumaqarmata tamatta atugarliortuusugut. Isummiutiinnakkat pissutigalugit maani inuuneq ajornakusoorpoq. Isiginngitsuusaaginnarneqarsinnaappulli inuillu eqqortut peqatigisarlugit, taanna Aarhusportalen.dk-mut oqaluttuarpoq.