Roskilde Festival
Pharrell Williams Roskilde Festivalimi pingaarnertut tusarnaartitsisuussaaq
41-nik ukioqartoq Pharrell Williams Orange Scenemi pingaarnertut tusarnaartitsisuussaaq aappaagu
Nipilersornikkut piginnaanilissuaq Pharrell Williams Roskilde Festivalimi aappaagu pingaarnertut tusarnaartitsisuussaaq. Taamaasilluni festivalimi nipilersortussani 169-iusuni nipilersortussat qulit inissinneqarput.
Roskilde Festival Facebookikkut nalunaaruteqarpoq.
Pharrell Williams kingullermik saqqummersippaa 'Girl' ilaatigut nuannarineqarluartoq 'Happy' ilaalluni. Danmarkimi Københavnimi kingullermik septembarimi tusarnaartitsivoq, Forumimi pisumik.
Nipilersortartunut assigiinngitsunut produceriusarpoq, soorlu suleqatiginikuuai Snoop Dogg, Nelly aamma Justin Timberlake. DR-ip paasititsinera malillugu Pharrel Williams Roskilde Festivalimiippoq kingullermik 2004-mi Nerd-ikkunnut tusarnaartitseqataagami.
Roskilde Festivalip nipilersortartut assigiinngitsut saqqummiutereerpai aappaagu tusarnaartitsisussat. Mew, metalrockimik tusarnaartitsisartut Lamb of God ilaatigut saqqummiunneqareerlutik. Suspekt aamma tusarnaartitsiumaarput Orange Scenemi.
Roskilde Festivalertoqassaaq aappaagu juunip 27-anit juulip sisamaat ilanngullugu. Aaqqissuisut allannguuteqartitsereerput, nipilersortut pingasunngornermi aallartinneqassapput arfininngornerup tungaanut. Sapaammi angerlakaasoqartarnera pissutigalugu sapaammi susoqartitsisoqassaanngilaq.