persuttaaneq
Persuttaasoqarnerani inuit pingasut savimmik kapineqarput
Nuummi sapaatip unnuaani, imerniartarfiup Kajistsiinaaqqap silataani persuttaasoqarnerani inuit pingasut savimmik kapineqarput.
Kalaallit Nunaanni politiit sapaatiummat unnukkut Nuummi imerniartarfiup Kajistsiinaaqqap silataani persuttaasoqarneranik nalunaarfigineqarput.
Inuillu pingasut savimmik kapineqarsimasut, politiit takkunnerit paasinarsisimavoq. Taakkualu pingasut tamarmik napparsimavimmut passutsikkiartorneqarsimapput.
Tamatuma kingorna pinerluttuliorsimasutut pasineqartoq tigusarineqarsimavoq.
- Paasiniaasoqarneranut eqqarsaatigalugu, massakkorpiaq suliamut annertunerusumik oqaaseqarsinnaanngilagut, Nuummi politiini pingaartuuneq, Jan Geisler paasissutissiivoq.
Inuit pingasut inuunerminnik navianartorsiornersut aamma paasineqarsinnaanngilaq.
Persuttaanermullu atatillugu takunnissimasinnaasut tusagaqarsimasinnaasulluunniit, politiinit ujartorneqarput. Saaffiginninnerit oqarsuaammut 701448-mut pissapput.
Jan Geislerip Sermitsiaq.AG-mut paasissutissiivoq, tallimanngormat arfininngormallu julefrokosternerit immikkut politiinut suliassaqartitsisimanngitsut.
- Sapaatip-akunneri naanerinut allanut sanilliutissagaanni suliassaqarneruliinnarsimavugut, pingaartuuneq paasissutissiivoq.