Alliaq

Persuttaasartunik katsorsaasarneq iluatsilluartoq

Inuit inooqatiminnut persuttaasartut Alliami siornali katsorsarneqarnissaminnut periarfissaqartinneqarput.

- Persuttaasartunut katsorsarneqarnissamik neqeroorut iluatsilluarpoq.

Namminersorlutik Oqartussat tusagassiuutinut nalunaarummi taama allapput.

Inuit inooqatiminnut persuttaasartut Alliami siornali 2016-imi katsorsarneqarnissaminnut periarfissaqartinneqarput.

- Alliaq kinaassutsimik isertuussilluni katsorsarneqarnermik ingerlatsinernik akunnernik 8-kkaanik sivisussusilinnik neqerooruteqartarpoq, mannalu tikillugu arnat angutillu 22-t naammassillutik katsorsartissimapput. Innuttaasut 14-it maannakkorpiaq katsorsartinneqarput. Alliaq-mi katsorsaanikkut anguniagaasoq unaavoq, persuttaasartunit persuttaasimanerup akisussaaffigineqarnissaa inooqatiminnullu persuttaasimanerminnut unitsitsisinnaaneq ilinniarneqassasoq, Namminersorlutik Oqartussat allapput.

Atuaruk: Angutit gruppiinik pilersitsisoqassaaq

Akerleriinnermik aqutsineq
Psykolog/terapeut-imik naammassillugu katsorsarneqarnermik ingerlatsereernermi persuttaasartumut inooqataasup kinaassutsiminik oqaatiginninnani apeqqutit immersugassami allassimasut akissavai. Tassani inooqataasup nalilissavaa katsorsaaneq ingerlaannarsimanersoq imaluunniit nangeqqiisoqarsimanersoq.

- Manna tikillugu inooqataasunit nalunaarutiginneqqittarnertigut takusinnaavarput, timikkut persuttaasarneq tamakkiisumik unitsinneqarsimasoq eqqarsartaatsikkullu persuttaasarneq malunnartumik annikillisinneqarsimasoq, Alliamut psykologitut ilinniagaqarsimalluni ataqatigiissaarisartoq Preben Svoldgaard Larsen oqaluttuarpoq.

Peqatigitillugu misissuinerup takutippaa, inooqatigiit nalileraat persuttaasartup akerleriittarnernik aqutsisinnaanermik piginnaasaqarnera assut pitsanngoriarsimasoq aammalu aappariinneq pitsaanerulersimasoq.

Alliaq Qaqortumi, Nuummi, Sisimiuni Ilulissanilu psykologeqarpoq katsorsaasartoqarlunilu.

- Immikkulli ittumik katsorsartinneqarnissamik ingerlatsinerit aammattaaq oqarasuaat aamma Skype atorlugit neqeroorutigineqartarput. Alliaq Kalallit Nunaannit tamanit saaffiginnissutsinik pissarsiaqartarpoq, Kujataani Narsamiit Avannaani Qaanaamut - Kitaani Nuummiit Tunumi Kulusummut, Tasiilamut aamma Ittoqqortoormiinut, tusagassiuutinut nalunaarummi tamanna oqaatigineqarpoq.

Powered by Labrador CMS