Perorsaasussaaleqineq: Nuummi akerliussutsimik takutitsisoqalersoq

Perorsaasut kattuffiata Nuummi immikkoortortaqarfia, NPK Nuuk, Nuummilu angajoqqaat politikerinut tusaqqullutik akerliussutsimik takutitsilerput.

Angajoqqaat perorsaasullu kattullutik perorsaasussaaleqisoqarnera pillugu Nuummi akerliussutsimik takutitsilersut.

Nuummi meeqqat meeraaqqerivinnut meeqqerivinnillu ullaakkut tunniunneqaraangata sulisunik amigaateqartoqakkajuttarpoq. Pissutsit ukiorpassuarni taamaareerput.

Taamaattoqartuarnera naammalersoq, Nuummi perorsaasut angajoqqaallu isumaqarput. Perorsaasut suleqatissaminnik amigaateqatalluinnarput, meeqqeriviillu sulisussaaleqiuarnerat angajoqqaanut toqqissisimanarunnaarpoq.

Maannalu kattullutik Nuummi akerliussutsimik takutitsilerput, naammaginnikkunnaarnertik borgmesterimut takutikkumallugu.

- Sulisuusugut, angajoqqaajusugut minnerunngitsumillu meeqqat qanoq iliortoqarnissaanut utaqqiinnarsinnaajunnaarpugut. Kommunip qanoq iliuuseqarnissaa paasissallugu piumasaraarput, Perorsaasut kattuffiata Nuummi immikkoortortaqarfiata, NPK Nuup tusagassiutinut nalunaarutaani allassimavoq.

Angajoqqaat suaartaateqartut

Angajoqqaat perorsaasullu kirkevejimiit Kommuneqarfik Sermersuup tungaanut, ataasinngorpat novembarip 19-ani ullaakkut nalunaaqutaq quliniit akerliussutsimik takutitsiniarput.

Tamanna pissaaq Nuummi angajoqqaaqatigiit paaqqinnittarfinni sulisussaaleqiuarnerisa pillugu naammaginnikkunnaarnertik takutittareeraallu.

- Tamanna toqqissisimananngilaq. Meeqqagut meeqqerivinnut qimattarpagut suliartorlutalu, nalunngikkaluarlugu sulisut paarsisinnaasut amigaatigineqartut, Trine Chemnitz Nuummi angajoqqaaqatigiit sinnerlugit Sermitsiaq.AG-mut oqarpoq.

NPK kisitsisaatai kingulliit naapertorlugit Kommuneqarfik Sermersuumi perorsaasut 49-t amigaatigineqarput.

Tusaaneqarusupput

Paaqqinnittarfinni sulisut, angajoqqaat paarsisullu Kommuneqarfik Sermersuumi pitsaanerusunik paaqqinninnissamut neqerooruteqartoqarnissaanik kissaateqarnertik nittarsaakkumavaat.

- Meeqqatta paaqqinnittarfinni illersorneqarsinnaanngitsuni paaritittarneri akuerisinnaannginnatsigukommunimi politikerinit akisussaasunit akineqarnissarput piumasaraarput, angajoqqaat tusagassiutinut nalunaarummi allapput.

Oqariartuutigineqartoq perorsaasut kattuffiatta Nuummi immikkoortortaqarfianit, NPK Nuummiit taperserneqarpoq.

- Akerliussutsimik takutitsiniarpugut, neriulluta oqariartuutigut Kommuneqarfik Sermersuup borgmesterianit tigulluarneqassasut akissuteqarfigineqassasullu, NPK Nuummit nalunaarummi allassimavoq.

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS