Perorsaasunik amigaateqarneq qaangerniarlugu pilersaarutit annertuut
Nunatsinni ulluunerani paaqqinnittarfinni perorsaasunik amigaateqarneq ajornartorsiutinik sunik nassataqarnersoq pillugu, quppernernik 67-inik quppernilimmik nalunaarusiortoqarpoq. Taamatullu sutigut pitsanngorsaasoqarsinnaaneranik pilersaarusiortoqarluni.
Nunatsinni meeraaqqeriviit meeqqeriviillu ilinniarsimasunik sulisussaaleqipput. Taamatullu ilinniarsimasut ilinniarsimanngitsullu suliffinniit soraartartut akulikipput.
Pissutsit ilungersunartut qaangerniarlugit, taamatullu meeqqat paaqqinnittarfinni ineriartorluarnissaat anguniarlugu, Naalakkersuisut periusissiamik iliuusissanullu pilersaarummik suliniuteqarput. Nalunaarusiaq, pilersaarusiarlu Sermitsiaq.AG-p pissarsiaraa.
Pilersaarusiami perorsaasut sulisullu allat ulluunerani paaqqinnittarfimmi sulinerminni atugaasa pitsanngorsaavigineqarnissaat siunertaavoq, taamaaliornikkut perorsaasunik amigaateqarnerup qaangernissaa anguniarlugu.
Suliaqartut akimorlugit suleqatigiinneq
Nalunaarusiaq naapertorlugu ullumi ima ittoqarpoq:
- Nunatsinni ulluunerani paaqqinnittarfinni sulisut tallimararterutaat perorsaasuupput.
- Pingajorarterutaat perorsaanikkut allatut ilinniagaqarput, perorsaasuunatilli.
- Sinneruttut, tassa ulluunerani paaqqinnittarfinni sulisut affaat, meeqqat atuarfiata saniatigut allamik ilinniagaqanngillat.
Suliniutinut pilersaarusiami aallaqqaasiummi Naalakkersuisut ima allapput:
- Taamatut pilersaarusiornermi Naalakkersuisut isumaqarput kommunit, sulisut nukissarisallu allat peqataatittariaqartut.
Perorsaasut atugaasa pitsanngorsaavigineqarnissaanut pilersaarut suliniutinut qitiutitanut tallimanut avinneqarsimavoq, taakkunannga suliniutit qitiutitat sisamat perorsaasut sulinerannut toqqaannartumik pitsanngorsaatissatut suliniutaassallutik:
- atorfinitsitsineq aamma sulisut suliinnarnissaannik qulakkeerinninneq
- ilinniartitsineq aamma piginnaanngorsarneq
- suliffimmi avatangiisit
- IT-mut tunngasut
- naliliineq, malitseqartitsineq aamma naleqqussaaneq
Tunuliaqut
Ilinniartitaanermut aqutsisoqarfik arlalinnik misissuititsisimavoq, ilaatigut sulisut piginnaanngorsarnissamut pisariaqartitsinerat misissuiffigisimallugu, taamatullu sulisut suliffimminni iluarisimaarinninnerat misissorneqarsimalluni. Ilanngullugu angajoqqaat meeraaqqeriviit meeqqeriviillu qanoq igineraat aperineqarsimapput.
Misissuinerit inerneri ukiuni tulliuttuni aaqqiissutissatut suliniutinik tallimanik kinguneqarpoq.
- Ulluunerani neqeroorutini sulisut pillugit Naalakkersuisut periusissiaa iliuusissanillu pilersaarutaa ingerlatsivinnut politikerinullu, suliniutinik assigiinngitsunik pineqartup iluani ineriartornermik qularnaarisussanik tulleriiaarinissap qularnaarnissaannut sakkuussaaq, Ulluunerani paaqqinnittarfinni sulisut pillugit Naalakkersuisut periusissiaat iliuusissanillu pilersaarutaanni allassimavoq.