familieliv
Periuseq nutaaq meeqqanut inuusuttunullu iluaqutaasoq
Sulinermi periuseq nutaaq tassaavoq, ilaqutariinnik siunersiueqatigiisitsineq taannalu kommunit Namminersorlutillu Oqartussat suleqatigiissutigivaat. Matumani siunertarineqarpoq, meeqqap inuusuttulluunniit ulluinnarni ajornartorsiutit aporfigisaat pillugit ilaqutariinnit tamanit ikorfartorneqartarnissaa
Ilaqutariit pinngitsoqaratik tamarmik nukittuffeqarlutillu nukissaqarput, taakkulu meeqqat inuusuttulluunniit inuttut ajornartorsiuleraangata ataatsimoorlutik atorluarsinnaanerulissavaat.
Ilaqutariinnik siunersiueqatigiisitsinermi inuk pillugu periuseqarneq Ilaqutariinnermut, Naligiissitaanermut Isumaginninnermullu Naalakkersuisoqarfiup kommuninut tamanut maannakkut siammarterniarlugu ingerlappaa.
Periuseq pillugu Kommuneqarfik Sermersuumi Tasiilami Meeqqanut Ilaqutariinnullu Immikkoortortaqarfimmi sulisut, Meeqqanut Ilaqutariinnullu Sullissivimmi sulisut, atuarfeqarfimmi sulisut kiisalu meeqqeriveqarfimmi sulisut 2015-ip naajartornerani pikkorissartinneqarput.
Peqqinngitsoqarpat neqeroorutigineqartartoq
Meeqqap inuusuttulluunniit peqqissusaa, alliartornera ineriartorneralu aarlerinartumiittut ernumassutigineqarpat, nalinginnaasumik ilaqutariinnik siunersiueqatigiisitsinissamik neqeroortoqartarpoq. Meeqqap ilaqutaasut allat, ikinngutit inuillu pingaarutillit allat ilaqutariinnit naapinneqartarput.
Ilaqutariinnik siunersiueqatigiisitsinermi ilaqutariit attaveqaatigisatik peqatigalugit meeraq inuusuttorluunniit qanoq ikiorneqarsinnaanersoq ikorfartorneqarsinnaasorlu eqqartueqatigiittarput, ataatsimoornissarlu pitinnagu meeraq angajoqqaallu peqatigalugit isumaginninnermut siunnersortip apeqqutit suliarisimasai najoqqutaralugit eqqartueqatigiinneq ingerlasarpoq.
- Ilaqutariinnik siunersiueqatigiisitsineq sulinermi periuseralugu Kommuneqarfik Sermersooq pitsaasunik misilittagaqarpoq, maannalu nuna tamakkerlugu atorniarneqalernera nuannaarutigaarput, Tina Dam Rasmussen, Meeqqanut, Ilaqutariinnut Atuarfeqarnermullu Ingerlatsivimmi ilaqutariinnut pisortaasoq taama oqarpoq.
- Meeqqanik ilaqutariinnillu mianernartumik inissisimasunik sullitaqarnermi, innuttaasut namminneq tunngavigisaat naapertorlugit ataqqineqartutut peqataatinneqartutullu misigitinneqarnissaat uagutsinnut pingaaruteqarpoq.
Ataqatigiissaarisoq
Ilaqutariinnut siunnersuineq tamaat kommunimi atorfeqartitaasumit ataqatigiissaarisutut arlaaannaanulluunniit attuumassuteqanngitsumit inissisimatinneqartumit aaqqissuunneqartarpoq.
Ataqatigiissaarisup ataatsimiinnermi attaveqaatit piareersartarpai, taavalu ilaqutariit ingerlatsiviullu akornanni arlaannaanulluunniit attuumassuteqanngitsutut inissisimasarluni.
Ilaqutariinnik siunersiueqatigiisitsinerup immikkoortuata siulliani meeqqap inuusuttulluunniit nukissaqarfii ilungersunartorsiorfiilu sulisunit paasissutissiissutigineqartarput. Tamatuma kingorna sulisut peqataatinnagit ilaqutariiusut attaveqaatigisatillu peqatigiillutik meeraq inuusuttorluunniit pillugu apeqqutit suliassallu eqqartussavaat pilersaarusiorlutillu.
Ingerlariaqqinnissarli eqqarsaatiglaugu sulisut pisariaqartinneqassappata aggersarneqarsinnaapput. Tamatuma kingorna ilaqutariit meeraq inuusuttorluunniit pillugu pilersaarusiussapput.