Tele-Post
Per Rosingip pisortamut apeqquteqaataa Kielsenip akissuteqarfigaa
Pisortap suliffiata avataatigut inuuneranut apeqquteqarneq tulluanngitsoq, Naalakkersuisut siulittaasuat isumaqarpoq
- Isumaga naapertorlugu naalakkersuinikkut suliassanut attuumassuteqanngitsunik inunnut ataasiakkaanut tunngassutilinnik apeqqusiillunilu pasilliinissaq pinaveersaarneqartariaqarmat, soorlu apeqqutigineqartumut uunnga tunngatillugu taamak pisoqarsimasoq.
- Inuiaqatigiit taamatut oqallinnerannut Naalakkersuisut peqataajumanngillat.
Isumaqatiginninngitsoq
Naalakkersuisut siulittaasuata Kim Kielsenip, Siumut, paragraf 37 naapertorlugu Tele-Postip pisortaanera pillugu, Inatsisartunut ilaasortap Per Rosing-Petersenip apeqquteqarneranut isumaqatiginninnginnini takutillugu taama oqariartuuteqarpoq.
Atuaruk: Isorineqaraluarluni: Telemi pisortaq Savalimmiuni angusarissaartitsisoq
Itisilinngikkaa
Telemi pisortaaneq siornatigut Savalimmiuni ingerlatseqatigiiffimmut amigartoortitserujussuarnikuunera Naalakkersuisut ilisimaneraat, Per Rosing-Petersen itisileeqquneqaraluarluni itisiliinani apeqquteqarpoq.
Atuaruk: Telemi pisortaq amigartoortitsinermut pasilliutigineqarnini taamaateqquaa
Taamatut apeqquteqarnera, politikerip Partiip Naleqqamit ilaasortaajunnaarsinneqarneranik kinguneqarpoq - ullumikkullu taanna attaviitsuuvoq. Partii Naleqqallu siulittaasua Hans Enoksen, Kristian Reinert Davidsenimut utoqqatsissuteqarpoq.
Atuaruk: Enoksen Telemi pisortamut utoqqatserpoq
Tunngavik
Kim Kielsenip akissutimini ilisimatitsissutigaa, Naalakkersuisut ‘akulerunnaveersaarnissamik’ tunngaviusoq ingerlatseqatigiiffiit namminneerlutik akisussaaffigisaannut tunngassuteqartoq aalajangiusimaniaritsik, taamaattumillu pisortat sorliit atorfinitsinneqarnerinut akulerunneq ajorput.
Naalakkersuisut ingerlatseqatigiiffiit ataatsimeersuarnerini siulersuisunut ilaasortanik toqqaanermikkut sunniuteqartarput - aammalu ingerlatseqatigiiffinnik oqaloqateqarnermikkut - kisianni atorfinitsitsinernuunngitsoq, siulittaasoq naqissusiivoq.
Taassuma ilanngullugu oqaatigaa, Tele-Postip siulersuisui tapersersorlugit.
Atuaruk: Tele-Postimi pisortap utoqqatsissut tiguaa