Per Rosing Petersen: Sooq Aqqaluaq B. Egede salluliorpa?

Qitiusumik allattoqarfimmi sulisunik kiisalu suliffeqarfinni namminersortitani il.il. direktørinik atorfinitsitsisarneq pillugit Naalakkersuisoq Aqqaluaq B. Egedep (IA) paragraf 37 naapertorlugu apeqqummut akissutaa pillugu, Inatsisartuni ilaasortap Per Rosing Petersenip (PN) apeqquserpaa.

- Sooruna Naalakkersuisoq, qanorluunniit piumasaqaataasuni, § 37 imm. 1 apeqqutaasup akissutimi oqaaseq “piumasaqartoqarsinnaassasoq” atorlugu eqqunngitsumik nalunaaruteqartoq, suna anguniarlugu?

Partii Naleqqap Inatsisartunut ilaasortaatitaa Per Rosing Petersen paragraf 37 naapertorlugu apeqquteqaammi Naalakkersuisunut taama aperivoq.

Piginnaasanut piumasaqaatit apeqqutigineqarsimasut

Naalakkersuisut atorfinititsisarnermut periuusissatut isumaliutigisaat sumut killinnersoq pillugu,
Per Rosing Petersen (PN) paragraf 37 naapertorlugu apeqquteqarsimavoq.

Qitiusumik allattoqarfimmi sulisunik kiisalu suliffeqarfinni namminersortitani il.il. direktørinik atorfinitsitsisarneq pillugit, piginnaasat Per Rosing Petersenip paragraf 37-imi akissuteqaammi nassuiaatitut pissarsiai kaajallaasitami § 2, imm. 1-imi ima allassimavoq:

“Piginnaasaqarfissatut piumasaqaatit ilagaaq suliassatigut piginnaasaqarnissaq aamma nalinginnaasumik piginnaasaqarnissaq, taakkununnga ilanngullugit kalaallisut, danskisut tuluttullu oqaatsitigut piginnaasaqarnissaq kiisalu kalaallit kulturiannik inuiaqatigiinnilu pissutsinik ilisimasaqarnissaq.”

Aqqaluaq: Pisinnaasanik nalinginnaasunik piumasaqartoqarsinnaavoq

Qitiusumik allattoqarfimmi sulisunik kiisalu suliffeqarfinni namminersortitani il.il. direktørinik atorfinitsitsisarneq pillugit kaajallaasitaq nutaaq 1. oktober 2017-imi atuutilertumik Naalakkersuisut suliaqarsimanerat, Aningaasaqarnermut Akileraartarnermullu Naalakkersuisup tassunga akissuteqaatingaa.

Tassungalu Aqqaluaq B. Egede ima nassuiaateqarpoq:

- Allannguutit pingaarnerpaat kaajallaasitami § 2, imm. 1, aamma § 9-mi takuneqarsinnaapput.

- Kaajallaasitami § 2, imm. 1-imi massakkut ima allassimasoqarpoq: »Piginnaasaqarfissatut piumasaqaatit ilagaat suliassatigut piginnaasaqarnissaq aamma nalinginnaasumik piginnaasaqarnissaq, taakkununnga ilanngullugit
kalaallisut, danskisut tuluttullu oqaatsitigut piginnaasaqarnissaq kiisalu kalaallit kulturiannik inuiaqatigiinnilu pissutsinik ilisimasaqarnissaq.«

- Kaajallaasitamilu § 9-mi imatut allassimasoqarpoq: »Naalakkersuisoqarfimmi pisortatut imaluunniit qitiusumik allattoqarfimmi pisortaanertut kiisalu suliffeqarfinni namminersortuutitani pisortaanertut atorfinitsitsiniarnermi qinnuteqartunut piumasaqaataapput kalaallisut, danskisut tuluttullu oqaatsitigut piginnaasaqarnissaq kiisalu kalaallit kulturiannik inuiaqatigiinnilu pissutsinik ilisimasaqarnissaq. Piumasaqaatit taakkua suliamut aqutsinermullu tunngasutigut pisinnaasaqartuunissamut piumasaqaatit assigalugit pingaartinneqassapput.«

- Kaajallaasitap allanngorneratigut erseqqissarneqarpoq atorfiit inuttaqartinneqanngitsut inuttalerneranni pisinnaasanik nalinginnaasunik piumasaqartoqarsinnaassasoq, soorlu kalaallisut suliatigut oqaalunnikkullu
piginnaasaqarnissaq kiisalu kalaallit kulturiannik inuiaqatigiinnillu kalaallinik ilisimasaqarnissaq.

Per Rosing Petersenilu (PN) akissutit kaajallaasitamut naapertuussorinnginnamigit, paragraf 37 naapertorlugu apeqquteqaqqippoq.