Inatsisartut
Per Rosing-Petersen: Nalunaaquttap nikittarnera atorunnaarsinneqarli
Aasaanerani nalunaaquttap nikisinneqartarnera silatusaarnerunngilaq, attaviitsoq Per Rosing-Petersen isumaqarpoq
Ukioq manna oktobarip 29-anni nalunaaqutaq ukiuunernut nikisikkutsigu, aappaagu aasaanerani nikiseqqittariaqanngilarput.
Inatsisartunut ilaasortaq attaviitsoq, Per Rosing-Petersen taama isumaqarpoq.
Taamaammat aasaanerani nalunaaquttap nikittarnera pillugu atorunnaarsinneqarnissaannik, Naalakkersuisut peqquneqassasut aalajangiiffigisassatut siunnersuuteqarpoq, taanna ullumi pingasunngornermi Inatsisartuni oqaluuserineqassaaq.
Atuaruk: Aasaanerani nalunaaquttap sinittarneq peqqissuserlu aserorsinnaavai
Issittoq allaanerusoq
Europamiut ikummatissanik sipaarniarlutik, ullullu qaamanera atorluarniarlugu nalunaaqutaq ukiumut marloriarlutik nikisittaraat paasivaa. Kalaallit Nunaannilu taamaattariaqanngilaq, siunnersuummini allappoq.
- Maanili uagutsinnullu nunarsuup avannaarsuarmiuusunut qaamaneq allarluinnaavoq, aamma nukissiornikkut pilersorneqarnitta 70 procentia sinnerlugu erngup nukinganik pilersorneqarluta, taamaattumik allamik tunngaveqarnissaa ilimanassaaq. Taamaattumik tamatsinnut soqutiginassooq paasissallugu sumik tamanna nikittarneq tunngaveqarnersoq, taanna allappoq.
Silatusaarnerunngitsoq
- Ilisimasakka tunngavigalugit nuna sanilerput Island aasaanerani nalunaaquttamik nikisitsineq ajorput, soorlu nunarsuarmiut amerlanersaasa aamma nalunaaqutaq nikisinneq ajoraat nikisittarunnaarsimalluguluunniit.
Aasaanerani nalunaaquttap nikisinneqartarnera taamaammat silatusaarnerunngitsoq, Per Rosing-Petersen isumaqarpoq, tamatumalu atorunnaarsinneqarnissaanut uppernarsaateqarluarnerarpaa.
Naalakkersuisut siunnersuut itigartikkaat
Naalakkersuisut akissuteqaateqarnerminni siunnersuut tapersersornagu allagaqarput.
- Aasaanerani nalunaaquttap atorneqannginnissaanut sanilliullugu, nunani innuttaasut, inuussutissarsiortut aamma Kalaallit Nunaanni oqartussaasut attaveqarfigisartagaanni amerlanerni aasaanerani nalunaaquttamik atuinerup malinnissaa, ataatsimoortumik isigalugu, aapertuunnerusoq Naalakkersuisut isumaqarput, Naalakkersuisut taama akissuteqarput.