Per Berthelsen Siumumi qaffariarpoq

Tupaallannartumik - tassami avataanit isigalugu - Per Berthelsen partiip Inatsisartuni gruppianni politikkikkut siulittaasunngorteqqinneqarpoq, taamatullu atorfeqarsimavoq qinigaaffimmi kingullermi. – Politikkikkut oqaaseqartartutut toqqaanermi taamatut tatiginninneq nuannaarutigeqaara. Ullut marlussuit atorsimavakka pissutsit isumaliutiginerannut, maannalu ullaap tungaani akuersillunga nalunaarpunga. Politikkitsinnik ersarissumik avammut nalunaaruteqartarnikkut partiip nittarsaannissaa qilanaaraara, Per Berthelsen knr.gl-imut oqaluttuarpoq. Siumumi politikeri misilittagaartooq taamatut qaffariartinneqarpoq malunnartumik pissaaneqarluartup Vittus Qujaukitsup juulimi parteqqamminik Per Berthelsenimik, Inatsisartunit anisinniarlugu sakkortuumik saassussinerata kingorna. Marsimi Inatsisartunut qinersinermi Per Berthelsen 112-nik taneqarpoq Inatsisartunullu qinigaanngitsoorluni. Inatsisartunullu ilaasortanngorpoq Siumup sinniisussaata pingajuatut iserami, inuit qinigaannut Vittus Qujaukitsoq - pisarnertut - inatsisartunit sulinngiffeqarallalermat Naalakkersuisunut ilaasortanngornini pissutigalugu. Inatsisartunilu ilaasortaaffimmik taassuminnga arsaarniarlugu Vittus Qujaukitsup Facebook-ikkut Per Berthelsen sioorarsaarpaa. Atuaruk: "Siumumi qalliuniunneq: Vittup Per B. anisinniarpaa" Atuaruk Per B: Kusanaak, Vittus" Atuaruk: "Vittus: Per B. naleqqussassaaq" Soraarsitsineq tupigusuutigaa Parteeqatigiit Siumukkormiut uissuumminartumik sakkortuumillu taamatut oqallinnerat pilerpoq Sermitsiaq.AG-mi oqaluttuarineqarmat aningaasanut Naalakkersuisoqarfimmi pisortaasimasoq Jan H. Lynge-Pedersen 2 millioner koruuningajannik akilerlugu atorfimminit maajip 30-anni soraarsinneqarsimasoq. Vittus Qujaukitsup Jan H. Lynge-Pedersenimik Aningaasanut Nunuallu Iluani Pissutinut Naalakkersuisoqarfimmit soraarsitsinera Per Berthelsenip "tupigusuutigaa" ajuusaarutigalugulu, taanna nalunnginnamiuk naalakkersuisoqarfimmi pisortatut pikkorissutut piginnaanilittullu.