aalisarnermut inatsit
Peqquserluttuliortarnermik pinaveersaartitsisut: Aalisarnermut inatsimmi inatsisit pipallataapput
Aalisarnermut inatsisissamut siunnersuut inatsisinik pipallatanik imaqartoq, Transparency Greenland (TIG), peqqusserluttarnerup pinaveersaartinneqarnissaanik aamma ammasuunissamik ilungersuuteqartoq isumaqarpoq.
Tusarniaanissamut piffisaliunneqarsimasoq sapaatip-akunnerini tallimaannarni ingerlanneqartussaasimangaluarnera, nunat tamalaat akornanni peqatigiiffiup tupigusuutigaa. Inatsisisatullu siunnersuummi kukkunnermik nassaartoqarmat killigitinneqartoq ulluni tallimani sivitsorneqarpoq.
Taamaattoqarsinnaanngitsoq
- TIG isumaqarpoq, innuttaasut inatsisissartut siunnersuummut isornartorsiorlutik isummernissaannik kissaateqannginnermik attanneqarsinnaanngitsumik takussutissiisoq imaluunniit inuiaqatigiit siunnersuummut siunnersuut pillugu oqallisiginninnissamik ataqatigiissaarititsisoqarusuppasinngitsoq, TIG tusarniaanermut akissummini allappoq.
Killiligaanngitsumik pisassiissutinik allannguiniarnermi piginnittuusinnaanermut iliuuseqarfiginninnertut isigineqarsinnaatillugu, inatsisissatut siunnersuut Europami inuit pisinnaatitaaffii pillugit isumaqatigiissummut sanilliullugu aamma Tunngaviusumik Inatsimmi paragraf 73-imut nalilersorneqarsimannginnera tupigusuutigineqarpoq,
Inatsit pipallataq
- Inatsisissatut siunnersuut aamma pipallatanik imaqartoq takuneqarsinnaavoq. Assersuutigalugu Nunatta Eqqartuussisuuneqarfia pingaarnertut siullertut oqartussaaffiussasoq atuarneqarsinnaavoq. Tamannalu inatsisitigut tunngavilernissaa aalajangerneqarsinnaanngilaq. Eqqartuussisoqarnermi inatsisitigut Kalaallit Nunaanni Eqqartuussivik pingaarnertut kisimi aalajangersaasinnaatitaavoq, TIG naqissusiivoq.
Tusarniaanermi piffissaliunneqartup sivikinnera TIG-mit uggorineqarpoq, taamaalilluni inatsisissatut siunnersuut misissoqqissaarneqarsinnaasimanngilaq.