unnerluutiginninnerit
Peqquserluttuliornermut unnerluutiginninnerit amerleriarujussuartut
Peqquserluttulionermut, qarasaasianut tunngasutigut peqquserluttuliornermut ilanngullugit unnerluutiginnissutit marloriaatingajammik amerleriarput, Naatsorsueqqissaartarfiup nalunaarusiaani kingullermi tamanna takuneqarsinnaavoq
2015-imi peqquserluttuliornermut politiinut unnerluutiginnissutit 115-iupput, siornalu taakku amerlassusaat 223-upput.
Affaat pigisanik tillinnermut tunngasut
Peqquserluttuliorneq immikkoortumut ''pigisanik tillinnerit'' ataaniippoq, tamannalu siorna politiinut unnerluutiginninnerit affangajarigaat, kisitsisini takussutissani takuneqarsinnaavoq.
- Pisuussutit tungaasigut pinerluttuliornerit annerpaartaat pisaartorniarluni pinerluttuliornerusimapput, tassaallutik najugarinngisamut iserluni tillinniarnerit, tillinnerit, niuertarfinni tillinnerit aammalu biilinik umiatsianillu akuerineqarani atuinerit. 2016-imilu pisuussutit tungaasigut pinerluttuliornerni niuertarfinni tillinnerit pinerluutini unnerluunneqarajunnerupput, pisuussutillu tungaasigut pinerluttuliornerit 19 procentiannik annertutigilluni, Naatsorsueqqissaartarfik ilisimatitsivoq.
Kalaallit Nunaanni Politiit teknologiimi ineriartornermut aamma qarasaasiakkut peqquserluttuliornerit amerleriarnerannut iliuuseqartariaqarsimallutik, politimesteri Bjørn Tegner Bay ilisimatitsivoq.
Politiit ilinniaqqittut
- Tamanna sulisut ilinniarteqqikkiartorlugit aallartinnerisigut pivoq, taamaalillutik qarasaasiatigut peqquserluttuliornernut suliat misissuiffigisinnaaniassammatigit, Bjørn Tegner Bay ilisimatitsivoq, politiit Københavnimi naalagaaffiup politiivinut ilisimasanik aallersinnaasut maluginiaqquaa. Suliat immikkuullarissuni Naalagaaffiup politiivini immikkoortortanut imaluunniit Kalaallit Nunaannukartitsinikkut misissuinermik ikiuisinnaasarput.
Allaanerusut
Qarasaasianut tunngasutigut peqquserluttuliornerit pinerluuteqarnernut allanit allaanerupput, politimesteri oqarpoq.
- Pinerluuteqartoq ungasissorujussuarmiissinnaasarpoq - assersuutigalugu Afrikami imaluunniit Ruslandimi. Tamakku immikkut ittunik unammilligassaqartittarpaatigut, Bjørn Tegner Bay ilisimatitsivoq.
Naatsorsueqqissaartarfiup kisitsisaataani takuneqarsinnaavoq, 2016-imi politiinut unnerluutiginninnerit 6.025-iusut, tamannalu ukiup siulianut sanilliullugu 7 procentinik qaffariarneruvoq.