Peqquserluttarnermut sukannernerusumik iliuuseqarneq

Akilersilluni peqquserluttuliortoqannginnissaanut politikkissaq nutaaq Naalakkersuisunit akuersissutigineqarpoq. Qitiusumik allaffeqarfimmi suliffeqarfinnilu ataaniittuni akilersilluni peqquserluttoqartannginnissaata pinngitsoortinneqarnissaa siunertaavoq.

Ikinngutinik salliutitsineq
Politikki arfineq-pingasunik immikkoortortaqarpoq, tassani sulisut peqquserlunnissaq pinngitsoorniarlugu qanoq saqqummertassanersut nassuiarneqarpoq. Immikkoortuni akilersilluni peqquserlunneq taakkartorneqarpoq, kisianni aamma ikinngutilersorneq taaneqarpoq.

- Sulianik suliarinninnermut, atorfinitsitsinermut, pisinermut, ikiuinermut, kiffartuussinermut allanulluunniit atasumik uatsinnut atatillugu inunnik salliutitsissanngilagut.

Naalakkersuisut akilersilluni peqquserluttoqannginnissaanut politikkia tamaat uani atuarsinnaavat

Inuit tallimaagaangata ataatsip politikerit peqquserluttuusut isumaqartarpoq
Transparency International Greenland ullut arlaqanngitsut matuma siorna Kalaallit Nunaanni peqquserluttarnermut barometerimik saqqummiussivoq. Inuit 22 procentiisa politikerit peqquserluttuusut taassuma takutippaa, 16 procentiilu inuussutissarsiornermik ingerlatsisut peqquserluttuusut isumaqarput.

- Innuttaasut amerlasuut peqquserluttarnermik ajornartorsiummik naammattuuisarnerat qiviarutsigu, amerlasuut assersuutigalugu ikinngutinik ilaquttanillu salliutitsineq akinerminni ilannguttaraat nalilerparput, Transparency International Greenlandimi siulittaasoq, Anita Hoffer, nalunaarusiamut pillugu oqaaseqarpoq.

Atuaruk: Tatiginninneq annikippoq

Attuumassuteqarpallaarneq
Peqquserluttoqannginnissaanik politikkip aamma soqutigisat akerleriinnginnissaat pinngitsoortinniassavaa, tassa sulisup aalajangiinermut nammineq iluaqutissaqartilluni aalajangeeqataannginnissaa.

- Inuiaqatigiinni ikittunik inulinni nunaqqatigiinni attaveqarnerit qaninnerisa kingunerisaannik nammineq soqutigisat aamma oqartussat soqutigisaasa akornanni soqutigisat ajornanngitsumik akerleriilersinnaapput, pappilissami allaqqavoq.

Naalakkersuisut iliuuseqarnerat naammanngitsutut nalilerneqartoq
Maannamut aatsitassanut naalakkersuisoqarfik taamaallaat akilersilluni peqquserluttoqannginnissaanik politikkeqarsimagaluarpoq, taannali politikki Namminersorlutik Oqartussanut tamanut atuutilerpoq. Immikkoortortat aamma nassuiaatit tigooqqarneqarput.

Taamatullu alloriarnissaq Transparencyp innersuussutigisimavaa. Tassami taakku misissuinerisa takutippaat, Naalakkersuisut peqquserlunneq akiorniarlugu iliuuseqanngippallaartut innuttaasut 63 procentii isumaqartut.

Tamanna iluarsiniarlugu suliniaqatigiiffiup innersuussutigaa, aatsitassanut naalakkersuisoqarfiup politikkia naalakkersuisoqarfiit sinnerinut siammarterneqassasoq.

Atuaruk: Naalakkersuisut peqquserlunnermut iliuuseqarnissamut sumiginnaasut

Oqaasertat qasunganerusut
Politikkimik akuersissuteqarneq asuliinnaannginnissaa Transparencyp aamma aarlerisaarutigaa.

- Tamanna sulisunik aamma ingammik aqutsisunik piviusunngortitsinissamut sungiusaanermik pisariaqartitsivoq, Anita Hoffer oqarpoq.

- Aammattaaq iliuutsit ammassutiginissaat pisariaqarpoq.

Peqquserluttoqannginnissaanillu politikkimi nutaami taakkorpiaat immikkoortut aatsitassanut naalakkersuisoqarfimmit allaanerupput. Aatsitassanut naalakkersuisoqarfimmi tunissutit pissarsiarineqartut saqqummiunneqartassapput, kiisalu suleqatigisat saqqummiunneqartassallutik.

Aammattaarlu peqquserluttarneq pillugu ukiumut nalunaarusiortoqartassaaq.

Politikkimi nutaami oqaasertaliussat qasunganerupput.

- Naalakkersuisut qitiusumik allaffeqarfianni suliffeqarfinnilu ataaniittuni aaqqissuussaanerup iluanisulli kikkunnut tamanut suleqatigisanullu isertuannginnissaq ammasuunissarlu anguniarpaat, politikkimi nutaami allaqqavoq.

Akilersilluni peqquserluttoqannginnissaanut politikkissami pingaartumik whistleblowerimik aaqqissuussinermik upernaakkut 2015-imi atuutsilersinneqartup malitsigisaatut. Sulisut eqqunngitsuliortoqarsorisaqartillutik kinaassutsimik isertuussillutik tassuuna nalunaaruteqarsinnaapput.