Peqqissaasunik amigaateqarnerup sulisut aalajangersimasut ilungersortippai

Peqqissaasut nutaat soraarummeernertik tulluusimaarutigalugu tallimanngormat nalliuttorsiutigaat. Peqqinnissaqarfimmilu sulisut piumaneqartuupput. Tassami peqqissaasorpassuit amigaatigineqarput. Tamatuma saniatigut ukiut tamaasa arfineq-marluk qulit tungaanut ilinniarsimalersunngortartut, naammattunik peqqissaasoqalernissamut naammanngillat.

- Maani Kalaallit Nunaanni peqqissaasunik pisariaqartitsineq matussuserniarlugu naammattunik ilinniartitsisinnaanerput ilimanaateqanngilaq, Peqqinnissaqarfimmi aqutsisoqarfiup pisortaa, Malene Marie Nielsen, Sermitsiaq.AG-mut oqarpoq.

Atorfiit 25-t inuttaqanngitsut

Peqqinnissaqarfimmit kisitsisit kingulliit takutippaat, atorfiit pingajorarterutaat juulip aallaqqaataani aalajangersimasunik inuttaqartut. Tassa atorfiit 300-nit 111-t. Atorfiit 184-it taartaasunit aamma sivikitsumik atorfinitsitanit sulisoqarput aamma 25-t inuttaqanngillat.

Naak ajornartorsiut maanna immikkut annertugaluartoq pinartuunngilaq, kisianni ajornartorsiutaajuartuuvoq.

- Peqqissaasunik amigaateqarnerup ulluinnarni nakorsiat sunniuteqarfigineq ajorpaat, kisianni ineriartortitsinissamut iliuuseriniakkagut tunulliuttariaqarnerinik kinguneqartarpoq. Taamaalilluta peqqinnissaqarfik takorluukkatsitut ineriartortissinnaanngilarput, Malene Marie Nielsen oqarpoq.

Aalajangersimasut pingaaruteqartuupput

Sulisunullu aalajangersimasunut 111-nut ingammik ilungersortitsisarpoq, taakku suleqatinik nutaanik naapitsiuartaramik.

- Sulisut aalajangersimasut ilungersortittarpaat. Taakku suleqatigiiaani assersuutigalugu nammatsisorisarpagut, sinerissamilu telemedicinimut tunngatillugu pingaarutilittut inissisimasarput.

Uani aasaanerani pisut ilungersunangaarmata, Sanami siniffiit uninngavissat matuneqartariaqarput. Ukioq mannalu ajornartorsiutip annertuneranut pissutaasut aalajangersimasuupput.

- Peqqissaasunut isumaqatigiissutip amigaataanera ukioq manna ilungersornerunitsinnut pissutaasut ilagaat. Inuimmi atorfinnut akuersinnginnerminni akissarsiassatik ilisimarusuttarpaat, aqutsisoqarfimmi pisortaq oqarpoq.

Inissat, atuarfiit aamma sulinngiffeqarluni angalanerit

Peqqinnissaqarfik maanna sulisussarsiornermik siunnersuisumik atorfinitsitsisimavoq, taassuma aamma peqqissaasut sooq soraartarnerannik misissuissaaq. Peqqinnissaqarfiulli pissutaasut tamaasa nammineerluni iliuuseqarfigisinnaanngilai.

- Sulisunut inissiat pitsaanerusut, inissiami interneteqarneq, aapparisap suliffissaani, atuarfinnut aamma paaqqinnittarfinnullu neqeroorutit aamma Danmarkimut akiliutsilluni angalanerit inuit suliinnarnissaannut imaluunniit aallaqqinnissaannut pingaarutilittut taakkartorneqartarput.

Peqqissaasut Danmarkimeersut sapinngisamik sivisunerpaamik sulisorinissaannut sulissuteqarnerup saniatigut aamma Peqqinnissaqarfik allanik suliniuteqarpoq.

- Danmarkimi napparsimmaviit anginerit arlallit suleqatigilernikuuagut, tassani peqqissaasut arlallit Kalaallit Nunaanni atorfimmik avitsisarput.

Nunanit allanit aallerniartut

Kisianni aamma Danmarkimi peqqissaasut piumaneqarput, upernaarlu isumaqatigiissummik nutaamik atukkatik pitsanngortinnikuuaat.

- Ungasinnerusoq eqqarsaatigalugu Danmarkip killiisa avataani peqqissaasunik sulisussarsiortariaqarpugut. Tamatuma periarfissaanissaanut suut piumasaqaataassanersut misissorneqarnissaanut naalakkersuisoqarfik oqaloqatigaarput.

Inuiaqatigiinni ajornartorsiut

Kalaallit Nunaata piukkunnartunik naammattunik qanoq ililluni sulisoqalersinnaaneranik tamatuma saniatigut Malene Marie Nielsenip siammasinnerusumik oqallittoqarnissaanik ujartuivoq.

- Tamanna uagutsinnuinnaq ajornartorsiutaanngilaq. Peqqissaasutut imaluunniit nakorsatut suliniaraanni piginnaatitaaffeqartussaammat uagutsinni tamanna ersarinneruinnarpoq. Kisianni inuiaqatigiit ajornartorsiutigaat, assersuutigalugu ilinniartitsisut, perorsaasut aamma isumaginninnermut siunnersuisut aamma taamaapput. Taamaattumillu piukkunnartunik sulisoqarnissamik sulisussarsiorneq siammasinnerusumik isigaluni oqallisigineqartariaqarpoq.