Peqqissaartut illuannut kajumilluni pulaartarneq kissaatigineqarpoq

Peqqissutsimut Ilisimatusarnermullu Naalakkersuisoq Doris J. Jensen kalaallit napparsimasut Kalaallit Peqqissartut Illuaniittut pulaarpai ataatsimeeqatigalugillu. Tamanna tusagassiuutinut nalunaarummi atuarneqarsinnaavoq.

Ilutigalugu Rigshospitalimi uninngasut arlallit aamma pulaarpai qitiusumillu aqutsisoqarfimmi siulittaasoq Sophie Hæstorph Andersen naapillugu. Naapinnermi Doris J. Jensen Qitiusumi aqutsisoqarfimmi siulittaasoq Københavnimi kalaallit napparsimasut pitsaanerusumik pulaartalerneqarnissaanut pilersaaruteqarnermik ilisimatitsivoq.

Peqqissartut kiserliortut

- Napparsimasut oqariartuutaat Danmarkimi suliaritinnerup nalaani kiserliorneq amerlanernillu sukisaarsarnissamik pisariaqartitsineq Naalakkersuisumit maluginiarneqarput, Doris J. Jensen ilisimatitsivoq.

Peqqinnissaqarfiup iluani pitsanngorsaaniarnerit saniatigut Naalakkersuisoq napparsimasunut kalaallisut oqaluttunik kajumissutsiminnik pulaartarsinnaasunik ujartuivoq.

Taamaattumik Doris J. Jensen pisortaq Leise Johnsen, tullersorti Niels Ole Jensen, Kalaallit Københavnimi eqqaanilu peqatigiiffiisa Kalaallit Illuutaanut aallartitaat Carsten Siegstad ataatsimiinnerup sioqqullugu ullumi naapippai.

Ukiamut ataatsimeeqatigiinnissaq

Susassaqaqatigiit Kalaallit Københavnimi eqqaanilu peqatigiiffiisa Kalaallit Illuutaanut aallartitaat kalaallit innuttaaqataasut pillugit ukiamut ataatsimoorlutik ataatsimiinnissaminnut piareersarniarput.

- Neriuutigaara nammineq kajumissutsiminik aaqqissuussamut peqataanissamut soqutigineqarluarumaartoq. Nammineq kajumissuseq tunngavigalugu pisariaqartitsineq angivoq ajoraluartumillu tamanna siunissami minnerulernavianngilaq. Nuannaarutigaara Kalaallit Peqqissartut Illuat aammalu ataatsimoorluni peqatigiiffimmi aallartitaq suleqatigiinnissamut isumaqataammata, taama oqarpoq Doris J. Jensen.