Peqqinnissaqarfik: 4.142-t utaqqisutut nalunaarsorneqarsimapput
Nunatsinni peqqinnissaqarfimmi utaqqisut allattorsimaffiat takivoq. Oktobarip aallaqqaataani inuit 4.142-t pilattaasunut aggersarneqarnissaminnut utaqqipput.
Kalaallit nalinginnaanngitsumik amerlasoorpassuit utaqqisut allattorsimaffianniittut, Peqqissutsimut naalakkersuisoq Doris J. Jensen paragraf 37 naapertorlugu akissuteqaammi ilisimatitsivoq.
Oktobarip aallaqqaataani pilattaasunut utaqqisut nalunaarsorsimaffianni inuit 4.142-rut nalunaarsorneqarsimapput.
Agguataarneqarnerat
- Allattorsimaffimmiittut 2447-it Dronning Ingridip Napparsimmavissuani nakorsiartussatut nalunaarsorneqarsimapput, 1695-illu piffinni nakorsaqarfinni immikkut ilisimasalinnit takuneqassallutik, Doris J. Jensen Demokraatineersumut Malene Vahl Rasmussenimut akissuteqarpoq.
Nalunaarsorsimaffimmi pineqartut peqqinnissaqarfimmi sulianut tamanut assigiinngitsunut tunngasut erseqqissarneqarpoq: assersuutigalugu suliaritittussatut, nalilersugassatut, misissugassatut assigisaatullu nakorsiartussatut nalunaarsorneqarsimapput.
Utaqqinerup sivisussaanut tunngatillugu ilisimatitsissutigineqarpoq, ‘’utaqqinissap sivisussusaanut apeqqutaajuaannarpoq suliat qanoq amerlassuseqarnersut kiisalu innersuunneqartut nutaat qanoq amerlatiginersut taamaattumik apeqquteqartumut ersarinnerusumik akissuteqartoqarsinnaanngilaq’’.
- Nakorsiat pinarsuartumik ajornartorsiutillit imaluunniit arlaatigut innarluutaasinnaasunik nakorsiassuteqartut erngertumik nakorsiartinneqarnissaat pisarpoq, tamannalu pisarpoq Dronning Ingridip Napparsimavissua tamakkiisumik ingerlanngikkaluartoq sulisunilluunniit amigaateqaraluartoq, Doris J. Jensen akissummi naqissusiivoq.
Immikkoortoqarfiit ammaqqissapput
Dronning Ingridip Napparsimavissuani nakorsianik passusisinnaasunik sulisussanik pisariaqartitsisoqarnera peqqutaalluni siniffiit atorunnaarnikuugaluartut atorneqaqqissinnaalissapput: K2 aamma K1.
K2 ammarneqareerpoq, K1 sapaatip-akunnerata tulliani ammarnissaa naatsorsuutigineqarpoq.