Peqqinnissamut Aqutsisoqarfik: Meeqqat pujortarfiusumiissanngillat

Angerlarsimaffimmi pujortartoqartariaqanngilaq, qitornat tupap pujuani stoffinut ulorianartunut pitsaanerpaamik illersorniaraanni. Tassa aamma meeqqat peqanngikkaangataluunniit. Taamatut tikkuaavoq Peqqinnissamut Aqutsisoqarfik, taassumalu quppersakkami nutaami tupap pujuata meeqqanut ulorianartoqarneranik mianersoqqussutini sakkortusivaa.
– Pujoq takuneqarsinnaasoq naaneqarsinnaasorlu kisimi meeqqanut uloriananngilaq. Ilisimasat nutaajunerpaat takutippaat tupap pujuani ´pisoqqami´ stoffit ulorianartut meeqqanut aamma sunniuttartut. Taamaattumik inassutigaarput angajoqqaat taamaallaat silami pujortartassasut, Peqqinnissamut Aqutsisoqarfimmi pitsaaliuinermut immikkoortoqarfimmi afdeling for Forebyggelsen og Borgernære Sundhedstilbud-imi (Fobs) siunnersortaaneq Politiken-imut oqarpoq.
Inassuteqaat sakkortusisaq nettimi tamanut saqqummiunneqaqqammerpoq, quppersakkap ´Ren luft til ungerne´ nutarterneqarneratigut.
– Sivisuumik oqarsimavugut illup iluani pujortartoqanngilluinnartariaqartoq. Taamaattumik pingaaruteqartorujussuuvoq Peqqinnissamut Aqutsisoqarfik maanna taamatut inassuteqarmat, nakrosaaneq Inge Haunstrup Clemmensen, Kræftens Bekæmpelse-meersoq, Politiken-imut oqarpoq.
Pujortaqqusinngilluinnarnermik inassuteqaat atuuppoq inersimasunut pujortartartunut tamanut, meeqqanut attaveqartartunut.
Tamanna Kræftens Bekæmpelse-p aningajoqqaat angerlarsimaffimminni qanoq iliortarnissaannut akulerunnertut isiginngilaa:
– Angajoqqaat qanoq iliornissaannik oqaluttuutinngilavut. Oqaluttuarpugulli meeqqat toqunartorpassuarnik pilersorneqartartut, tamakkualu stoffinngortartut kræfteqalersitsisinnaasut, nakorsaaneq Inge Haunstrup Clemmensen Politiken-imut oqarpoq.