ilisimatusarneq
Peqqinneq pillugu nalunaarusiami ilisimasat nutaat pissanganartut
Kalaallit Nunaanni inuit peqqissusaasaannut tunngatillugu ataasiakkaanik pitsanngoriartoqarpoq, peqqinneq pillugu nalunaarusiap annertuup tamanna takutippaa. Nunatsinnilu pissanganartunik assigiinngissuseqartoqarpoq
Peqqissuseq pillugu misissuinermut atatillugu inersimasut 2.102-t kommunini sisamani apersorneqarnikuupput.
Inersimasut peqataasut uuttortarneqarput oqimaalutarneqarlutillu, aallu naqitsinera misissorneqarluni apeqqutinillu akisaqarput. Katillugu illoqarfiit 11-t aamma nunaqarfiit arfineq-pingasut peqataapput.
Nunanit allanit peqqiinneruneq
Statens Institut for Folkesundhed Peqqissutsimullu Naalakkersuisoqarfiup suleqatigiillutik innuttaasut peqqissusaannik misissuineq pingaarnertut nalunaarusiatut saqqummersippaat. Kisitsisit nutaajunerpaat 2014-iminngaanneersuupput.
Maani nunatsinni innuttaasut peqqissusaat, nunat allat pitsaassusaat eqqarsaatigalugu suli ungasikkigut tassani atuarneqarsinnaavoq.
Atuaruk: Tarnikkut ikiueqqaarnermi ilitsersuisut nutaat qulit
Peqqissutsimut naalakkersuisup, Doris Jakobsenip (S), qujanartumik annertuumik pujortartartut amerlassusaat ikileriarsimasut oqaatigaa.
- Pitsaasuuvoq 1993-imilli annertuumik pujortartut ikileriarsimammata aammalu angerlarsimaffinni illup iluani pujortarnerit ikiliartorsimanerat, taanna oqarpoq.
Inuttut ajornartorsiutit apeqqutaasut
Taassuma saniatigut Doris Jakobsenip pitsaannginnerarpaa, innuttaasut inersimasut 57 procentersui suli pujortartartuusut. Aammalu 1999-imilli pujortartut ikileriarsimannginneri.
- Tamanna toqqissisimananngilaq. Tupami toqujaarpallaartarnernut pequutaasut annersaraat ilaatigut puakkut kræfteqarnikkut allatigullu kræfternikkut, politikeri oqarpoq.
Atuaruk: Kinguuaassiutitigut nappaatinut paasititsiniaaneq nutaaq
Peqqinnermi assigiinnginneq inuiaqatigiinni annertusoq nalunaarusiap takutippaa, assiliarli ataasiinnarmik takutitsinngilaq.
Pujortarnerli eqqarsaatigalugu ersarippoq inuit qaffasinnerusumik inissisimasut akornanni allanut sanilliullugit pujortarnikinnerusut.
Suliffeqarneq iluaqutaavoq
Illuatungaanilu pualavallaarneq angutit illoqarfinni ilinniarluarsimasut akornanni marloriaataavoq angutinut nunaqarfimmiunut sanilliullugit.
Pualavallaarneq arnat akornanni assigiippoq inuiaqatigiit iluanni sumiluunniit inissisimagaanni.
Suliffeqanngitsut inunnit suliffilinninngaanniit peqqinnginnerujussuupput.
Aamma sumiiffiit assigiinngissutinik ersersitsipput. Tunumi imminorusuttarneq malunnartumik ersarinneruvoq nunap sinneranut sanilliullugu.
Arnat inuusuttut ikiaroornartumik atuisut ikinnerusut
Misissuinermi peqataasut affaanik amerlanerusut hashimik pujortarneq misilissimavaat. Siuisinnerusunut sanilliullugit angutit inuusuttut qaamaammut hashimik pujortartartut amerlanerupput. Angutit 18-34-llu akornanni ukiullit pingajuarterutaat minnerpaamik qaammammut ataasiarlutik hashitortarput.
Illuatungaanili pitsaavoq arnat akornanni hashitortarneq tamatigut apparsimammat.
Innuttaasut peqqissusaannik misissuisarnerit 1993-mili ingerlanneqartalerput.
Atuaruk: Peqissutsimut Naalakkersuisoqarfik pisortartaartoq
Atuaruk: Inunnut imminut toqunniarlutik eqqarsaatilinnut neqeroorutit amerlanerusut