Barcelona
Peqqarniisaarniat saassuffigisaanni kalaallit 300 meterinik ungasitsigisumiissimapput
Kalaallit takornarissat marluk Barcelonami peqqarniisaarniarluni saassussineq qanimut misigisaqarfigaat
Aqissiaq Ludvigsenip arnaatinilu sisamanngormat Barcelonami saassussisoqarnerani misigisaat alianarsimapput.
- Pisoqarnerata nalaani La Rambla eqqannguaniippugut. Tamatuma siulinnguani alianartumik pisoqarfimmissiimavugut. Allamulli sangusimanngikkaluarutta pisoq qanittuaqqamiit misigisimassangaluarparput, Aqissiaq Ludvigsen Sermitsiaq.AG-mut oqaluttuarpoq.
Misigisaq sinnattuusinartoq
- Inuit arpaleriasaarput, qaartartumillu qaartoqarsimasoq oqaatigineqarluni. Sumi tamaani uivertoqarpoq, allamiinnerpummi pissutigalugu susoqavissimanera ilisimanngilarput.
- Misigisaq sinnattortuusinaannarpoq, allaanngilarmi filmimiilluni. Iliuusissaaleqinarsimaqaaq. Taamaammat arnaatingalugu qanoq iliussanerluta eqqarsaatigilluarniarsarivara, inoqannginnersamukassallutali aalajangiullutigu, taanna oqarpoq.
Misigisaq tupannartoq
Aqissiaq Ludvigseni arnaatinilu, sapaatip akunnera Barcelonameereerlutik tallimanngormat Danmarkimut angerlareersimapput.
- Misigisaq tupannaqaaq, taamatulli misigisaqarnissarput eqqarsaatiginikuunngisaannarparput. Inuit sumut tamaanga arpannerisa nalaanni eqqarsaatersornaqaaq. Qaartartumimmi qaartoraluarpat imaluunniit maskingeværimik seqqortaartoqaleraluarpat taava? Misigisaq sussaanngilaq, Aqissiaq Ludvigsen oqarpoq.
Barcelonamukaqqikkusuttut
Taamaattoq siunissami Barcelonamukaqqikkusussinnaapput.
- Naak misigisaq nuanniisimangaluaqisoq Barcelonamukaqqinnissarput eqqartorsimavarput, illoqarfimmi alianaatsorujussuuvoq. Pisup ersilersissappatigut peqqaaniisaarniat ajugaaffigissavaatigut. Barcelonameeqqileruttali misiginikuusarput eqqaanngitsoorunnanngilarput, Aqissiaq Ludvigsen oqarpoq.