Nunat inoqqaavi
Peqatigiinnikkut pitsaanerusukkut nunatsinni pisinnaatitaaffiit qulakkeerneqassapput
Ulloq nunani tamalaanni nunat inoqqaavisa pisinnaatitaaffiinik atuutilersitsinissamut illersuinissamullu erseqqissaaffigalugu atorneqartarpoq
Aggustip qulingiluaat tassaavoq Naalagaaffiit Peqatigiit (FN) Nunarsuarmi Nunat Inoqqaavinut ullorititaat. FN-illi tallimanngornermi aggustip 8-anni ulloq nalliussereerpaa, arfininngornerunera pissutigalugu, ICC Grønlandip siulittaasortaava Hjalmar Dahl tusagassiorfinnut nalunaarutikkut paasissutissiivoq.
Ullup qulequtarisaa tassaavoq: “Peqatigiinneq Pitsaanerusoq: Nunat Inoqqaavisa Pisinnaatitaaffiisa Atuutilersinneqarnerat”, peqatigiinneq isumaqartinneqarluni suleqatigiinneq.
Ulloq nunani tamalaanni nunat inoqqaavisa pisinnaatitaaffiinik atuutilersitsinissamut illersuinissamullu erseqqissaaffigalugu atorneqartarpoq.
– Naalagaaffiit Peqatigiit ullormut qulequtarititaat nalaatsornerinnaanngilaq. Nunarsuarmi Nunat Inoqqaavisa pisinnaatitaaffii nunarsuarmioqatigiinnit 2007-imi akuersissutigineqartut suli ullumikkut tamakkiisumik Naalakkersuisoqarfinnit akuerseqataasunit atuutilersinnissaat ungasippoq, taamaattumillu atuutilersinnissaat siunertaralugu suli ilungersuuteqarpugut, Hjalmar Dahl, ICC Kalaallit Nunaata Siulittaasortaava ullormut atatillugu oqarpoq nangillunilu:
– Tamatumani nunarsuatsinni Naalagaaffiit 2007-mi akuerseqataasut annertuunik pisussaaffeqarput aamma Danmark Nunarpullu. Taamaattumik Naalakkersuisoqarfiit attuumaffigisavut attaveqarfigisavullu ullumikkornit annertunerusumik pitsaanerusumillu peqatigiinnermik pitsaanerusumik angusaqarfigerusullugit ilungersornerput nangissavarput.
– Taamaattumik ukiuni tullerni sisamani ICC Kalaallit Nunaanni siulittaasuunissanni Nuummi allaffeqarfipput aallaavigalugu paasititsiniaaneq annertusillugu aamma angalasarnikkut aallunniarpara, Hjalmar Dahl naggasiivoq.