Peqatigiiffik Tasiorta matuvoq

Kinguaassiutimikkut atornerlunneqarsimasunut tapersersuilluni peqatigiiffik, Tasiorta, januaarip naanerani matusussanngorpoq.

Matusussanngorneranut pissutaavoq peqatigiiffiup aningaasaqarnermigut kinguaassiuutimikkut atornerlunneqarsimasunut neqeroorutigisartakkani nammassinnaajunnaarmagit.

Peqatigiiffiup kinguaassiutimikkut atornerlunneqarsimasut katsorsarneqarnerannut ikorfartoqatigiiffeqarnerannillu ingerlatsisaraluarpoq, ukiarmili aningaasaqarnermigut taakkua nammassinnaajunnaarlugit paasivaa.

Atuaruk: Tasiorta ukiortaamit matusussanngorpoq

Neriorsorneqarsinnaannginneq matusinermik kinguneqarpoq
Peqatiffiiup matuinnartariaqalerneranut aalajangerneq pivoq pivoq Namminersorlutik Oqartussat peqatigiiffimmut nalunaaruteqarmata, pisortat akissuteqarsinnaanngikkallartut peqatigiiffik 2015-imut tapiissutinik pissarsissanersoq, tapiissutimmi aningaasaqarnermut inatsimmi aatsaat illuartinneqarsimatillugit tunniunneqarsinnaasarmata.

- Tamatta ajuusaarutigaarput Tasiortap matusariaqalernera.

Taama peqatigiiffiup Tasiortap siulittaasuata tullia, Ivalo Møller Lange, tusagassiuutinut nalunaaruteqarluni allappoq. Taannalu ima nangippoq:

- Soorunami qujamasuutigaarput pissusissamisoortutullu isigalutigu Ilaqutariinnermut Naalakkersuisoqarfiup inuit sullinneqartussat – aamma Nuummiittut – sullinneqarneri nangittussanngormagit.

Oqarasuaat aamma matuneqareerpoq
Tasiortami ilaasortat peqatigiiffik Tasiorta matuinnarniarlugu immikkut ataatsimeersuarnermi ippassaq marlunngornermi aalajangerput.

Tasiortap oqarasuaataa ‘141’ aamma januaarip 15-anili matuneqareersimavoq.

Nunatta karsianit Tasiortamut tapiissutaasarsimasut 2013-imi 400.000 koruunioriarlutik 2014-imi 300.000 koruuniusimapput.

Atuaruk: ‘Tasiorta’ oqartussanit illuatungilerneqarpoq