Hjertelivet

Peqatigiiffik pilersinneqaqqammertup uummalluttut atugaannik pitsanngorsaaniartoq

Hjertelivet tassaavoq Kalaallit Nunaanni peqatigiiffik nutaaq nunatsinni peqqinnissaqarfimmi uummalluttutatugaannik ajortunik pitsanngorsaaniartoq.

Lars og Elise Bruun
Lars Bruun arlaleriarluni uummammigut suliarittarsimasoq panialu Elise Bruun, peqatigiiffimik Hjertelivetimik pilersitseqataasoq

Elise Bruunip ataataa, Lars Bruun, ukiuni aqqaneq-marlunni uummalluuteqartoq, maajip qaammataani uummammigut sisamariarluni pilatsippoq.

Rigshospitalimilu annertuumik suliaritereerluni, sakiaa ammarneqarluni, Kalaallit Nunaanut sungiusarneqarnissamut periarfissaqarpallaanngitsumut angerlarpoq.

Aamma atuaruk: Uummalluttut Sanami pilertornerusumik nakorsarneqartalissapput

Sivisuumik utaqqinerit

- Taanna paasitinneqarpoq, timimik sungiusaasumi inissaqarnersoq – sivisuumik utaqqisariaqartoq ilisimallutigut –paasiniaaqqullugu nakorsiartarfimmut sianeqquneqarpoq. Tamannalu pissusissamisuunngilaq, Elise Bruun peqatigiiffik Hjertelivetimik pilersitsisimasoq, Sermitsiaq.AG-mut oqarluttuarpoq.

Taanna uummalluuteqartunut allanut, taama misigisaqarsimasunut apersuisimavoq, tamarmik misigisaat assigiissimapput. Taammaammat angunnilu, Lars Bruun, Jørgen Bay-Kastrup aapparillu Ilulissaninngaanneersut Niels Davidsen, uummalluutilik, nulialu Lena Ravn Davidsen peqatigalugit peqatigiffik pilersippaat.

Attaveqarniarneq ajornannginnerusoq

- Taamaattumik Hjertelivetip sulissutigissavaa uummalluttut qanigisaasullu imminnut attaveqarluarnerunissaat, illoqarfimmi sungiusaasunit sungiusarneqarnissamik aaqqissuusseqataaneq kiisalu uummalluttut suliaritinnissaq sioqqullugu, suliaritinnerup nalaani kingornalu pisariaqartitaminnut tunngatillugu annertunerusumik pitsaanerusumillu ikiorneqarnissaasa peqqinnissaqarfimmit pingaartinneqarnerunissaa sulissutigissallugu, peqatigiiffik tusagassiuutinut nalunaarummi allappoq.

Nunatsinni uummalluttut illoqarfigisaminni sungiusarneqarnissamut periarfissinniarlugit aningaasanik katersuiniartitsinissaq, peqatigiiffiup sulissutigissutiginiarpaa.

Halvmarathonimi arpaqataaniartoq

Hjertelivetimut katersuiniartitsinermut atatillugu oktobarip 28-anni Kangerlussuarmi halvmarathonimi Elise Bruun Hjertelivet-ilu nittarsaanniarlugu arpaqataassaaq. Nuuk Marathonimilu angunni arnanilu peqatigalugit 10 kilometerimut arpassapput.

Arpannermi suliffeqarfiit Hjertelivet-imik aningaasatigut taperseerusuttut ilisarnaatiminnillu arpaatissaanut ikkusserusuttut ujartorpai.

Tunissuteqartoqarsinnaasoq

Aningaasanik tunissuteqartoqarsinnaavoq Grønlandsbankenimi kontotsinnut 6471-1585026. Aamma Hjertelivetimut ilaasortanngortinnaavutit ukiumut inersimasunut kr. 100. koruuninik meeqqanullu 50. koruuninik akiliissuteqarnikkut. Aningaasat tamarluinnarmik nunatsinni uummalluttut ikiornissaannut atorneqassapput, peqatigiiffik paasissutissiivoq.

Aamma timersorneq, nerisaqarneq, pujortarunnaarniarneq allatigullu inooriaatsimik allanngortitsineq aallunniarlugu piffissap ingerlanerani Hjertelivet annikinnerusunik aaqqissuussisassaaq.

Aamma atuaruk: Nakorsiartut aatsaat taama amerlatigisut Danmarkiliartinneqartartut

Powered by Labrador CMS