naalagaaffeqatigiinneq

Peqatigiiffik Naalagaaffeqatigiiffik pilersinneqarpoq

Savalimmiormiut, Kalaallit danskillu arlallit ataatsimoorlutik peqatigiffimmik pilersitsipput naalagaaffeqatigiinnerup ataavarnissaanik nukittorsarnissaanillu siunertaqarlutik

Nauja lynge
Naalagaaffeqatigiinnerup attatiinnarneqarnissaanut illersuisut peqatigiiffianni siulittaasoq, Nauja Lynge

Savalimmiormiut, kalaallit danskillu arlaliullutik Københavnimi ataatsimiinnerminni 'Peqatigiiffik Naalagaaffeqatigiiffik' pilersippaat, siunertaralugu naalagaaffeqatigiffiup ataavartuunissaanik nukittorsarnissaanillu taamatullu qaqugussamut kinguaassat iluaqutigisinnaasaannik nuannaarutigisinnaasaannillu, peqatigiiffiup siulittaasua aallarnisaasorlu Nauja Lynge tusagassiutinut nalunaarummi allappoq. Peqatigiiffimmi siulittaasup tullerissavaa Folketingimi ilaasortaq kiisalu lagmandiusimasoq, Edmund Joensen.

Taamaasilluni peqatigiiffimmik nutaarluinnarmik inuinnarnik soqutigisaqaqatigiinnermik tunngavilik pilersinneqarluni, naalagaaffeqatigiinnerup ajattorneqarnerata nalaani.

- Ersarissumik Naalagaaffeqatigiiffipput angerparput, upperigatsigu Savalimmiut, Kalaallit Nunaat Danmarkillu siunissami aamma ataqatigiissuunissaat pisinnaammat pissasorlu, aammalu upperigatsigu taanna ataqatigiinneq ukiuni uuntritilippassuarni ingerlasimasoq, nutaamik eqqortumillu ataqqeqatigiinnermik taamatullu atorluarsinnaasatsinnik suleqatigiissinnaanerput tunngavilerlutigu, taamak oqarpoq peqatigiiffiup aallarniisua siulittaasunngortorlu, Nauja Lynge oqarpoq.

Naligiinnissaq
-Naalagaaffeqatigiiffik qaffasinnerusut kisimik ataatsimoorfigissanngilaat, taamatullu allaffissornikkut suliallit kisimik imminnut allakkianik uteqattaarfigissanngilaat, kisialli nunat taakku inuii ataatsimoorlutik peqatigiiffigissavaat, tassanilu pituttorsimaffigaarput savalimmiormiut, kalaallit danskillu akornanni immikkuullarissumik qanilaartumillu ilaqutaqaqatigiinnerput.

- Taamaammat taakku inuiaqatigiit pingasut akornanni ataqatigiinnitta nukittorsarnissaanik suliniuteqarniarpugut nukigut tamaasa ajunnginnerpaamik atorlugit, Nauja Lynge oqarpoq.

Siulersuisut ukuupput: Nauja Lynge, Jairus Lyberth, Martine Lynge Lyngesen, Nikolaj Olsvig, Edmund Joensen, Morten Larsen aammalu Michael Keldsen.

Kinaluunnit peqatigiiffimmut ”Peqatigiiffik Naalagaaffeqatigiiffik”-up siunertaanut tapersersuisoq ilaasortatut tikilluaqqungaarparput. Peqatigiiffiup siunertai, malittarisassai, peqatigiffiullu siulersuisuisa kikkuuneri atuarsinnaavatit una atorlugu: foreningen-rigsfaellesskabet.com, taakkulu savalimmiormiusut, kalaallisut dansk-isullu allassimapput.

Powered by Labrador CMS