meeqqat inuusuttullu

Peqatigiiffik Kalaallit Meerartaat nutaamik allaffissornermik pisortartaassaaq

Tina Frausing Peqatigiiffik Kalaallit Meerartaanni ukiuni arfineq pingasuni allaffissornermik pisortaareerluni annertuumik sungiusaqqittussaanini pissutigalugu atorfimminit tunuarpoq

Tina Frausing Peqatigiiffik Kalaallit Meerartaanni ukiuni arfineq pingasungajanni allaffissornikkut pisortaareerluni tunuarpoq - assi toqqorsivimmit

Peqatigiiffik Kalaallit Meerartaat nutaamik allaffissornermik pisortartassarsiulerpoq. Meeqqat inuunerulernissaanik suliniuteqartup allaffissornikkut pisortaa tunuarneranut pissutaavoq.

- Tina Frausingip ajoqqusernini pissutigalugu sungiusaqqittussanngormat suliffimmi annertuumik piumasaqaatitalimmit tunuarpoq. Suleqatigiinnerput unitsinniarlugu aalajangerpugut, Tina Frausingillu ukiuni kingullerni arfineq pingasuni allaffissornikkut pisortatut sulilluarsimaneranik qujassuteqarfigalugu, Peqatigiiffik Kalaallit Meerartaanni siulersuisuni siulittaasoq Mads Thyregod tusagassiutinut nalunaarummi oqarpoq.

Tina Frausing peqatigiiffimmi angusaqarluarsimasoq oqaatigineqarpoq, aningaasaliisussanik nassaassarsiullaqqissutut attaveqaqatigiinnikkullu pitsaasutut aamma oqaatigineqarluni.

Tina Frausingip sulisimanini nuannaraa
Peqatigiiffik Kalaallit Meerartaasa maannamut angusarisimasaat allaffissornikkut pisortaajunnaartup nuannaarutigai.

- Suliarpassuit ukiuni taakkunani suliagut nuannaarutigaakka. Aningaasaqarneq pitsaanerulerpoq kiisalu Danmarkimi aningaasaqarnermut inatsimmut suliagut aamma atuutilerlutik, Tina Frausing oqarpoq.

Allaffissornikkut ingerlatsinermi tullersortaasoq Puk Draiby peqatigiiffiup ingerlanneqarnerani aqutsisuugallassaaq.

Powered by Labrador CMS