qinngasaarineq

Peqatigiiffik: Ilinniartitsisut meeqqat nipaatsut isiginiassavaat

Peqatigiiffiup Kalaallit Meerartaasa kalaallit meeqqat Danmarkimi atugarliortut qinngasaarneqartarnerat ilisarisinnaavaat.

Kalaallit meeqqat Danmarkimiittut amerlasuut qinngasaarneqartarput. Meeqqat pillugit siunnersuisoqatigiit nalunaarusiaanni sapaatip-akunnerata siuliani saqqummertumi tamanna takutinneqarpoq.

Siunnersuisoqatigiit nalunaarusiamut meeqqat arfineq-marluk apersorpaat. Peqatigiiffiup Kalaallit Meerartaasa, meeqqanik atugarliortunik sullissisup, meeqqanut ikorfartortarialinnut tunngatillugu ataatsimut isigalugu taamaattoqartarnera uppernarsarneqarsinnaanerarpaat.

- Meeqqat pillugit siunnersuisoqatigiit meeqqat nipaannerusut aamma kiserliornerusut nalunaarusiamut tunngatillugu oqaloqatigaat. Taakku pineqartillugit ikinngutitaarnissaminnut aamma ataatsimooqataanissaminnut ajornakusoortitsinerusarput, qinngasaarneqarnissamullu qaninnerusarlutik, peqatigiiffiup pisortaa, Puk Draiby, Sermitsiaq.AG-mut taama oqarpoq.

Atuaruk: Kalaallit meeqqat Danmarkimiittut qinngasaarneqartartut

Meeqqat nipaatsut malugineqanngitsoortartut
Meeqqat taakkorpiaat nipaatsuupput, amerlanertigullu malugineqanngitsoortarlutik, nalunaarusiaq inerniliivoq. Iluarusunngitsut takuneqanngitsoortarput, taamaalillutillu pisariaqartitaminnik ikiorneqanngitsoortarput.

- Ilinniartitsisutut imaluunniit perorsaasutut meeqqat taakku nipaatsut peqataanersut maluginiarneqarnissaat pingaartuuvoq, imaluunniit ataatsimoornermi tapersersorneqarnissaat pisariaqarnersoq, Puk Draiby oqarpoq.

Meeqqat pillugit siunnersuisoqatigiiffiup nalunaarusiaq tunuliaqutigalugu nuna tamakkerlugu iliuusissatut pilersaarusertoqarnissaanik kajumissaarivoq. Peqatigiiffik Kalaallit Meerartaasa tamanna tamakkiisumik taperserpaa.

- Immikkut ittumik meeqqat ilaannut neqerooruteqarnissaq pingaaruteqarsinnaavoq, soorlu uagut taamaaliortartugut. Sunngiffimmi sammisaqarnermut tapersersuinerusinnaavoq, ilinniakkerinermi ikiuneq imaluunniit angajoqqaanut ikiuineq, meeqqatik atuarfimmi tapersersorsinnaassammatigit.

Atuaruk: Meeqqanut kalaallinut Danmarkimiittunut pilersaaruteqartoqarnissaanut piumasaqartut

Isummat pigiliutiinnakkat atorunnaarlugit
Danskit kalaallit imerajuttuunerannik isummiussereertarnerat meeqqat namminneq nalaattarpaat, nalunaarusiaq taama takutitsivoq. Danskit akornanni isumaliorpaluttumik oqaluttarnissamut Puk Draiby kaammattuivoq.

- Ataatsimut isigissagaanni, taava isummat pigiuliutiinnakkat nuanninngitsut atorunnaarsinneqartariaqarput.

- Tassami meeraq tamakkuninnga nalaataqartoq nuanniilliortinneqartarpoq. Nuannersut aamma ukkatarisariaqarpagut - assersuutigalugu kalaallit qallunaallu suut ataatsimoorussarineraat. Taamaalilluta pitsaasumik naatsorsuuteqarluta naapissinnaavugut.

Powered by Labrador CMS