Pele Møller Band Københavnimi
Nuummi jazzimik nipilersortartut Kalaallit Illuutaannut qaaqquneqarput tallimanngorpallu tusarnaartitsissallutik
Københavnimi Kalaallit Illuutaanni aqagu tallimanngornermi juulip 5-anni unnukkut kalaallit jazzimik nipilersortartut tusarnaartitsissapput.
Jazzertartut nuannarineqartut "Pele Møller Band", siorna Copenhagen Jazz Festivalimi peqataasimasut, ukioq manna Nuummit tikisinneqaqqaipput.
– Ukioq manna Copenhagen Jazz Festivalimut ilaasortaarusussimanngilagut, siorna quppersagaanni fem tusinde koruuninut titarnerit pingasuinnaat eqqaaneqaratta pakatsinaqimmat. Taamaattumik ukioq manna nammineq tikisippavut, nipilersoqatigiillu aqagu nalunaaqutaq 16-imiit tusarnaartitsissapput, Kalaallit Illuutaanni kulturimik paasissutissiinermillu sulialik Søren Thalund Sermitsiaq.AG-mut oqarpoq.
Guitarertartoq, erinniortoq taalliortorlu Pele Møller Qullissani nipilersortalerpoq, tassani 1950-ikkunni 1960-ikkunnilu kalaallit nipilersugaat nutaaliat aallartimmata. Ilaatigut Vajgat Orkestret kalaallit nipilersoqatigiit siullersaraat 1960-ikkut aallartinneranni nuutinik EP-nik arlalinnik saqqummersitsisut. Taamanikkut tamanna tupinnaqaaq eqqaasitsinerullunilu Kalaallit Nunaanni issittumi sulisartut eqeeriartulernerannik siuariartulernerannillu.
2007-imi Pele Møller KODA-p ataqqinaammik nersornaasiuttagaanik tunineqarpoq, nunatsinni nipilersornermik sivisuumik ingerlatsisimanini pillugu.