Pele Broberg Partii Naleqqamit qinigassanngortippoq
Aluu Airlinesimi pisortaasimasoq, Pele Broberg, Inatsisartunut qinersinermi Partii Naleraq tunuliaqutigalugu qinigassanngortippoq.
Tallimanngornermi ualikkut Partii Naleqqap tusagassiortunik katersortitsilluni Inatsisartunut qinersinissamut partiimit qinigassanngortittut kingulliit saqqummiuppai.
Pele Broberg Inatsisartunut qinersinissamut Partii Naleraq sinnerlugu sassartoq, tusagassiortunik katersortitsinerup aallartilaarnerani Partii Naleqqap Facebookimi quppernermini saqqummiuppaa.
Pele Broberg, ullumikkut Namminersorlutik Oqartussani atorfeqartoq, ukiorpassuarni timmisartortartuusimavoq, Aluu Airlinesimilu pisortaasimalluni.
- Ullutsinni pissutsit naammagiunnaarlugit Inatsisartunut qinigassanngortinniarlunga aalajangerpunga. Inuiaqatigiinni ikiuniarluta sassartariaqarpugut, taanna videoliami ilisarititsinermi oqarpoq.
Inatsisartunut qinersinissamut Partii Naleqqap qinigassanngortittut maannamut saqqummiussimasaasa aqqi tamarmik Sermitsiaq.AG-p tallimanngornermi ualikkut saqqummiukkumaarpai.
Inatsisartunut qinersinissamut qinigassanngortittunik nalunaarutit kingusinnerpaamik apriilip pingajuanni nal. 12.00 kommunimut tunniunneqassapput.