Pdac: Aatsitassarsiorfinni ingerlalluartut akornanni Kalaallit Nunaat appariaqqittoq

(Allaaserineqartoq 10.41 nutarterneqarpoq)

Nunat aatsitassarsiornikkut qanoq ingerlanersut Fraser Institutemit nalilersorneqartarpoq. Kalaallit Nunaat tassani appariaqqippoq. Politikkikkut ingerlatsinermi Kalaallit Nunaat 31-tut inissippoq, aatsitassarsiornerlu tamaat isigalugu 41-tut inissilluni.

Sulisitsisut Peqatigiiffiata aaqqissugaanik Kalaallit Nunaanni aatsitassarsiorneq sammineqarpoq Canadami sapaatiummat. Aaqqissuussamut aggiasoqarluarpoq. Aatsitassanik saqqummersitsineq Pdac Torontomi ingerlanneqarpoq, tassani neriuutigineqarpoq aningaasaliisut suliffeqarfiillu soqutiginnilernissaat.

Kalaallit Nunaanni aatsitassarsiornissamut suliffeqarfiit pingasut soqutiginnipput. Nunatsinni aatsitassarsiornissaq pitsaasumik takorloorpaat.

Suliffeqarfinniilli oqaatigineqarpoq aatsitassarsiornissamut qinnuteqaatit oqartussaasunit sukkasuumik suliarineqartarnissaat pingaaruteqartoq.

Oqallinnerup aallartinnerani Fraser Institutep naliliisimanera saqqummiunneqarpoq. Taanna tupaallaatigineqarpoq, tassami Kalaallit Nunaanni aatsitassarsiorneq nunarsuatsinni pitsaanerpaat 41-rigaat. 2013-mut sanilliullugu inissisimaffinnik 23-nik appariarpoq (2012-mi 14-tut Nunarput inissisimavoq). Aatsitassarsiornermik politikkikkut 32-tut inissisimalluni.

Nakkariangaatsiarneq
Kalaallit Nunaanni aatsitassarsioneq ataatsimut tamaat isigalugu 41-tut Nunarput inissisimavoq. Ukioq kingulleq qulingiluaattut inissisimavoq. Botswana, Namibia, Zambia aamma Peru Kalaallit Nunaannit pitsaanerusumik inissisimapput. Canadami issittumi inissisimasut aamma Kalaallit Nunaannit pitsaanerusumik inissisimapput.

Aatsitassarsiorfiilli oqaatigaat Kalaallit Nunaat aatsitassarsiorfigissallugu pitsaanerusoq Norgemit Frankrigimiillu. Fraser Institutemit Kenneth P. Greenip nassuiarpaa sooq Kalaallit Nunaat allattorsimaffimmi appariaateqarsimanersoq. Politikkikkummi aamma ukioq kingullermit qulingiluanik appariaateqarpoq.

Pissutaasut
Kalaallit Nunaata akileraartariaasaata allannguuteqarsimanera pissutaalluni allattorsimaffimmi appariarsimasoq ilisimatitsissutigineqarpoq. Aleqa Hammond-ip Naalakkersuisutut siulittaasuugallarmat akileraartariaaseq royalty eqqunneqarpoq.

Kalaallit Nunaata aatsitassai aamma ilisimaneqarpallaannginneri appaariaateqarnermut pissutaavoq. Aatsitassarsioqatigiiffinnilli oqaatigineqarpoq Kalaallit Nunaat politikkikkut pitsaasumik inissisimasuusoq.

- Kalaallit Nunaat siornatigut pitsaasumik nalilerluarneqartarpoq, ukiunili kingulliunerusuni appariartorluni, Kenneth P. Green naliliivoq.

Pdac pingasunngorpat tungaanut ingerlanneqassaq. Kalaallit Nunaannit inuit 60-t peqataapput. Inuussutissarsiorfinnit assigiinngitsunit peqataasoqarpoq kiisalu aamma aningaasaqarnermut aatsitassarsiornermullu naalakkersuisoq Anda Uldum, Demokraatit, aamma peqataalluni.

Tusagassiivik Sermitsiaq.AG-mit aamma Pdac peqataaffigineqarpoq