Partiit nunap karsia aningaasanik immerneruniarpaat

Tunissutinik kiap akilissaneraa nassuiaqqaarnagu agguaaginnartoqassanngilaq. Akileraartarnermut aningaasaqarnermullu naalakkersuisup, Aqqaluaq B. Egedep (IA), aappaagumut aningaasanut inatsisissaq saqqumiukkamiuk tamanna aallaqqaataanit erseqqissarpaa.

- Taamaattumillu immikkut suliassaqarfinnut suliniutinulluunniit aningaasaliissuteqarnerunissamik kissaateqartoqassappat aningaasaliissutinik aalajangersimasunik allatut tulleriiaarinikkut isertitaqarnerunikkulluunniit aningaasalersuinissaq pisariaqassaaq, taanna ullumi inatsisartuni naqissusiivoq.

Partiilli ullumi oqallittoqarnerani sakkortuumik tulleriiaarinerit ulapputigivallaanngilaat. Nunap karsianut ungasinnerusoq eqqarsaatigalugu aningaasanik amerlanerusunik pissarsisoqarsinnaaneranik isummatik oqaatigineruaat.

Siumumeersup Jens Immanuelsenip siammasinerusumik inuussutissarsiorneq nunap karsianut iluaqutaassasoq oqaatigaa.

- Aningasarsiornikkut ataasiinnaanerusumik tunngaveqarluni ingerlatsinitta kingunerisaanik suli sukangasumik tulleriiaarisariaqarnermiippugut, taamaattumik sanaartornikkut takornariaqarnikkullu aningaasarsiornikkut iluaquteqarnerunissarput aalluttuartariaqarparput aamma aningaasalersuinissat eqqarsaatigalugit aningaasammi amigaataasut aningaasaliinerunikkut siunissami pitsaanerusumik isaatitsiviusinnaanerat kissatigigutsigu saneqqussinnaanngilarput.

Inuit Ataqatigiit meeqqanut aningaasat amerlanerusut atorneqarnissaat oqariartuutigaat.

- Inunnut aningaasaliineq siunissamut aningaasaliineruvoq. Meerartavut inuusuttavullu maanna ikiorutsigit erniinaralaaq pissarsiassavut katersorumaarpavut. Aaqqissuussinerit taakku inuit ataasiakkaat aningaasanik atugassaqarnerulernerannik nassataqassammata inuit ataasiakkaat aningaasatigut atugassaqarneruliinnassanngillat inuiaqatigiinnili aningaasat kaaviiaarnerat sukkanerulissalluni taamalu aningaasarsiornermut iluaqutaassalluni, IA-p oqaaseqartartua Kelly Berthelsen oqarpoq.

Demokraatit illuatungiliuttortatuanngornikuupput. Partiillu aningaasaqarnikkut akisussaassuseqarneq pingaartinniartuuaa.

- Massakkut anigaasaqarnikkut inissisimanerput ajunngittorujussuuvoq, kisianni ajorluinnaqqissaarpoq Naalakkersuisut 2018-mut Aningaasanut Inatsisissamut Siunnersuutaanni taamaallaat 9 millioner koruunit sinneqartoorutigineqassasut tagginneqarmat. Ileeqqaarisoqanngilaq, aningaasalli ingerlatsinermut atorneqarput, ingerlatsineq allaffissornerlu, Randi Vestergaard Evaldsen partii sinnerlugu oqarpoq.

Taassuma maanna parteeqatigiunnaarsimasaa, Michael Rosing, Demokraatit ilungersuussaasa ilaat, tassa sulinerup akilersinnaasariaqarnera oqariartuutigaa.

- Inuit angerlarsimaffitik ilaquttatillu qimallugit nunarsuup sinneranut sumuugaluarnersoq suliartortartut ataqqivakka. Taamatulli oqareerlunga taava eqqortuusinnaanngilaq sulisussanik tikisitsiortorneq uffa inuppassuit suliffissaaleqigaluartut. Imaasinnaavoq tamatumunnga pissutaasoq sulinerup akilersinnaannginnera. Tassanilu iliuuseqartariaqarpugut suliffillit aningaasaataannik arsaartorunnaarlugit, attaviitsoq oqarpoq.

Partii Naleqqap aamma sulisut tikisitat pillugit apeqqut qaqippaa. Kisianni allatut oqaaseqarfigalugu.

- Naluneqanngilaq Namminersorlutik Oqartussat suliassanut, kiffartuussinernullu assigiinngitsunut atatillugu aningaarsarparujussuarnik nunatta avataanut akiliuteqartartut. Tassani assersuutigineqarsinnaapput nunatta avataani siunnersortinut aningaasartuutit ilaatigut ukiumut 200 mio kr.it angullugit annertussuseqartartut. Sillimmasiinernut suliffeqarfiit namminersorlutik oqartussanit pigineqartut, namminersorlutillu oqartussat sillimmasiinernut aningaasartuutaat, Namminersorlutik Oqartussat nunatta avataanut suliakkiissutigisartagaat assigiinngitsut ilarparujussuilu ilanngullugit, partiip oqaaseqartartua Anthon Frederiksen oqarpoq.