Oqaatsit
Partiit inuusuttaat sisamat: Tuluttut pikkorinnerulerta
- Assersuutigalugu sineriak tamakkerlugu innuttaasut tuluttut oqaluussinissaannik periarfissaqaraangata atorluarneqarnerusalernissaa anguniarlugu arlaatigut aaqqiissuteqartoqarsinnaavoq, paartiit inuusuttaat sisamat isumaqarput
- Partiit Inuusuttaaneersuusugut tamattaalluta neriutigaarput nunaqqatigiilluta siunissami tuluttut oqallorinnerulerumaartugut.
Partiit inuusuttaasa siulittaasui, Aqqalu Jerimiassen (A), Lars Salik H. Kielsen (IA), Paarnannguaq Tobiassen (PN) kiisalu Steve O. Sandgreen (S). ataatsimoorussamik tusagassiuutinut nalunaaruteqalutik allapput.
Atuaruk: Tusagassiuuteqarfiit kalaallisut pitsaanerulissasut
Inuiaqatigiit tuluttut pikkorinnerulissasut taakku isumaqatigiissutigaat.
- Tuluttut oqaatsit periarfissiisarput, nunarsuattalu sinnera uagutsinnut tikikkuminarnerulissammat, nunarsuullu sinneraniit tikikkuminarnerulissagatta, tusagassiuutinut nalunaarummi erseqqissaatigineqarpoq.
Sineriak tamakkerlugu tuluttoorsinnaaneq
Taakku isumaqarput, sapinngisamik aaqqissuulluagaasariaqartoq, angusaqarfiulluarnerpaanissaa isumannaarumallugu.
Atuaruk: KNR oqaatsit atorneqarneri pillugit: Pitsaanerusinnaavugut
- Ilinniarfeqarfiit, pisortaqarfiit, tusagassiiviillumi ajornanngippat ataqatigiissaakkamik suleqatigiissapput. Assersuutigalugu sineriak tamakkerlugu innuttaasut tuluttut oqaluussinissaannik periarfissaqaraangata atorluarneqarnerusalernissaa anguniarlugu arlaatigut aaqqiissuteqartoqarsinnaavoq, siulittaasut sisamat allapput.
Unammilligassat
Taakkuli qularitiginngilaat unammilligassaqarumaartoq.
- Tamannali unittoorfiussanngilaq, qularinngilarpummi imminut akilerumaartoq siunissami. Paasissutissat pissarsiarisinnaasagut, paarlaateqatigiiffigisinnaasagut, niueqatigisinnaasagut, nunarsuarmioqatitsinnullumi neqeroorutigisinnaasagut, tamarmik pitsanngoriartussaapput tuluttut oqallorinnerulerutta. Taamaammat nunaqqatigiiulluta tuluttut oqallorinnerulernissarput siunniunneqarnissaa ataatsimoorluta oqariartuutigaarput, taama nalunaaruteqarput Aqqalu Jerimiassen, Lars Salik H. Kielsen, Paarnannguaq Tobiassen aamma Steve O. Sandgreen