Partiit inuusuttaasa kollegianik sanaartortitsinissaq neriorsuutigaat
Pingasunngormat partiit inuusuttaasa aaqqissungaannik Nuummi GUX-imi ilinniartut qineqqusaarfigineqarput
Pingasunngormat Nuummi GUX-imi partiit inuusuttaasa inussuttunut qineqqusaarnissamik aaqqissuussaqarsimammata politikkimik oqallittoqarpoq.
Kollegiassaaleqineq annertummat tupigusuutissaanngitsumik oqallinnermi kollegialiortitsinissap pisariaqartinneqarnera oqallisigineqarpoq.
Partiit inuusuttaasa tamarmik isumaqatigiissutigaat, kollegianik sanaartortitsisoqassasoq, ingammik Nuummi.
Ilinniartut atugaat pingaartinneqassasut
Demokraatit kollegialitsisinissamut aningaasaliinerusinnaapput.
- Eqqarsaatigisariaqalerparput nunatsinni aningaasat qanoq atortarnerigut. Maanna pingaarnersiuisoqartariaqalerpoq, kollegiassaaleqinerujussuummi nalaani, tunngaviusumik inatsisissatut isumalioqatigiissitap siulittaasua sumi najugaqassanersoq misissorneqarpoq. Kollegialiortitsinissamut aningaasaliinerusariaqarpugut. Allaffissornerujussuaq sipaarniarfigineqarsinnaavoq tassanngaanniillu aningaasat aallugit, Frederik Siegstad (D) Inatsisartunut qinigassanngortittoq, oqarpoq.
Atassummiit illoqarfinni ilinniarfinnik ingerlatsiviusut kollegiamik sanaartorfiunissaat siunnersuutigineqassamaarpoq.
- Kollegialiortitsinissaq assut pisariaqartinneqarpoq, ingammik tamaani Nuummi. Qaqortumi Sisimiunilu aamma taamaattoqarpoq, Atassummiit taakkunani arlalinnik kollegialiortitsinissaq siunnersuutigissavarput. Aningaasat Inatsisartut ilaqutaasa angallanneqarnerinut aningaasartuutinit tiguneqarsinnaapput, Atassummeersoq Kajpeter Heinrich oqarpoq.
Allaffissorneq annikillisarneqassaaq
- Siumumiit kollegialiortitsisoqarnissaa pingaartilluinnarparput, Naalakkersuisullu sanaartortitsinissamut milliardit affaat angullugit aningaasaliissuteqarnikuupput. Ilinniartulli atugaasa pitsanngorsaavigineqarnissaat aamma pingaaruteqarpoq. Ilinniartut pitsaanerusumik sinaakkutissaqarnissaat qinersinerup kingorna partiit oqallisigisariaqarpaat, Siumut Inusuttaani siulittaasoq Steve Olsvig Sandgreen oqarpoq.
- Pitsaanerusumik atugaqarnissaq partiit suleqatigiissutigissavaat. Kollegiat ullutsinnut naleqquttuussapput anigaasallu suminngaanniik aaneqarnissaat oqallisigineqassaaq, Anders Jensen (IA) oqarpoq.
- Namminersorlutik Oqartussani sulisorpassuit ataatsimiikkiarlutik angalasarput, Skype-qarporlu ataatsimiilluni atorneqarsinnaasumik. Tassani kollegialiortitsinissamut aningaasarpassuit aaneqarsinnaapput. Namminersorlutillu Oqartussat allaffeqarfiini nutserinermut aningaasarpassuit aamma atorneqartarput. Nutaanik kollegialiortitsinissaq angalanerniit nutserinermiillu pingaarnerusariaqalerpoq, Partii Naleqqaminngaanneersoq Paarnannguaq Tobiassen oqarpoq.