Tuesday, November 14, 2017 - 13:00

Partiit immikkut 3 million koruuninik imminut tapiissuteqarfigisut

Assi.: Leiff Josefsen
Partiit qinigaatitallit tapiissutisiaasa amerlineqarnissaat Inatsisartut ullumi aalajangerpaat.

Partiit Inatsisartuni ilaasortaatitallit tapiissutisiarisartagaasa qaffaavigineqarnissaat Inatsisartut amerlanerussuteqarluinnarlutik ullumi akueraat.

Siunnersuut 17-inik taperserneqarluni, marlunnik akerlerineqarluni pingasunillu taaseqataaffigineqarani akuerineqarpoq. Demokraatit kisimik (Justus Hansen sinnerlugu) attaviitsorlu Michael Rosing, kisimiilllutik siunnersuut itigartitsissutigaat.

- Siullermeerinnerup nalaani partiinut tapiisutigineqartut atorfissaraluannut atornagit qineqqusaarnerup ingerlanerani atorneqarsinnaapput, tamatumunngalu pissutaavoq ilaasortaatitat malillugit tapiissutit tunniunneqartarnerat, aningaasallu qineqqusaarnerup nalaani atorneqaratik sulinermut atugassiaaneri aamma piumasaqaataanani, Michael Rosing (Attaviitsoq) sapaatip-akunnerup siuliani aappassaaneerinninnermi oqarpoq.

Kim Kielsen (S), Sara Olsvig (IA) aamma Múte Bourup Egede (IA) akuersinatillu itigartitsinngillat.

Partiinut tapiissutit 10 million koruunioreerput, massakkulli tassa 3 million koruuninik amerlineqarput.

Immikkut aningaasaliissutit ima agguataarneqassapput 1.045.000 Siumumut, 915.000 koruunit IA-mut 395.000 koruuniit Demokraatinut Partii Naleqqamullu 65.000 koruunillu Michael Rosingimut.

Seneste nyheder / Nutaarsiassat kingulliit