Partiinut tapiissut annerit marluk attornianngilaat

Partiit angisuut - Siumut aamma IA - partiinut tapiissutip allanngorneqarnissaanut Demokraatit siunnersuutigigaluagaannut tunngavissaqartitsinngillat. Sammisaq pillugu oqallinneq sivisooq, tassani Kim Kielsenip tamat oqartussaaqataaneranni pissaanerup qanoq agguataarneqarneranik Inatsisartunut ilaasortat ilinniartippai.

Partiinut tapiissut Demokraatit allanngortikkusuppaat, ataatsimut isigalugu aningaasartuutit 20 procentinik annikillisinneqassapput, taakkulu ukiumut 2.725.600 koruuninik naleqarput.

Politikerit alloriaqqaaritsi

Qitiusumik allattoqarfimmi imaluunniit inuiqatigiinni atukkani allani sipaarniartoqannginnerani, partiinut tapiissummi sipaartoqarneratigut politikerit alloriaqqaarnermik takutitsisinnaasut, siunnersuuteqartoq Randi Vestergaard Evaldsen isumaqarpoq.

Partiit annersaat siunnersuutip kinguneranik aningaasanik ikinnerusunik pissarsisalissagaluarput.

Inatsisartut siunissami qanoq ineriartornissaat oqallisigeqqaartinnagu, inatsisissatut siunnersuut kisimi tunngaviusinnaanngitsoq, Múte B. Egede IA-meersoq isumaqarpoq.

‘’Naalakkersuinikkut sulinermi partiinut pisussaaffilersuineq annertusiartortillugu tapiissutitigut annikillisaanissaq tulluartuunngitsoq naapertuuttuutinngitsoq,’’ Jess Svane Siumumeersoq isumaqarpoq. Siunnersuut siulittaasoqarfimmit nalilersugassanngorlugu ingerlateqqinneqassasoq, taassuma kissaatigaa.

Partiimit nuunneq akeqassaaq

Immikkoortumi ataatsimi Partii Naleqqameersup Jens Napaattuup Demokraatit siunnersuutaat tapersorsinnaavaa.

- Partiimiit partiimut qinersiviup iluani nuuttartut partiimut nuuffigisamut iluanaarutaassaarnissaat Partii Naleqqamiit pitsaasutut isigalutigu tapersersorparput, Jens Napaattooq taama oqarpoq, Demokraatiniillu siunnersuutigineqartup imarisaasa sinneri akuersaanngilai.

Qallunaatut nutserinerit sipaarfigineqarlik

Aleqa Hammondip sipaaruteqartoqarsinnaanera qularutiginngilaa, partiillu paasissutissiissutitik qallunaatuumut nutserneqartarnerannut aningaasartuuterpassuit tikkuarapai.

- Massakkut partiitut allaffissornermi aningaasartuut annerpaatut taasariaqartoq piffissamillu annerpaamik atuisoq tassaavoq danskisuunngortitsinersuaq. Tamanna sipaarutigineqarsinnaasutut isigaarput siunnersuutigalugu partiinut suliarinneqartarnera unitsinneqarsinnaasoq siulittaasoqarfiullu danskisut nutserneqartarnissaanut akisussaaffik ilanngullugu tigusinnaagaa oqilisaanermilu aqqissuussineq ingerlassinnaallugu, Aleqa Hammond oqarpoq.

Naalakkersuisut siulittaasuata Kim Kielsenip oqaatigaa, partiinut tapiissutit pillugit Naalakkersuisut siunnersuuteqartussaanngitsut, sulissaq Inatsisartut ataatsimiittarfianniimmat aamma Inatsisartut Siulittaasoqarfianiimmat.

Sulisitsisut sulisitsisuunngitsulluunniit?

Kim Kielsenip Naalakkersuisunut siulittaasutut partiinut tapiissutit pillugit akuliulluannginnera pakatsissutigaa.

- Sulisitsisoraatsigit, Partii Naleqqap oqaaseqartartua oqarpoq.

Tassani Kim Kielsen tamat oqartussaaqataaneranni pissaanerup agguataarneqarneranik ilinniartitsisariaqarpoq.

- Naagga, Naalakkersuisut sulisitsisorinngilatit. Innuttaasut sulisitsisoraagut, Kim Kielsen akivoq, Aleqa Hammondimullu maluginiaqquaa, danskit oqaasii Inatsisartuni atorneqarsinnaasoq, kisianni soorunami oqaatsinik pikkorissartoqartariaqartoq, kalaallit oqaasii arlaanni kisimik atorneqalerniassammata.

Siulittaasoqarfimmut ingerlateqqinneqartoq

Kim Kielsenip innersuussuteqarnerata kingorna siunnersuut Inatsisartut Siulittaasoqarfianut suliassanngortinneqarpoq.

Powered by Labrador CMS