Politik
Partiinut allanut nuuttartut takussaanngillat
Atassutip Michael Rosing ilaasortaanngortinniaraluarpaa, taassumali partiiliornissaminut pilersaarutimipiviusunngortinnissaat sulissutigiinnarpaa. Ulluni makkunani Vittus Qujaukitsoq oqaloqatiginiaruminaappoq
Juullikkunni Vittus Qujaukitsoq sakkortuumik pualluppoq piffissap ilaanni nukisaalalersitsisumik. Maannali peqqissiartoqqilerluni AG-mut nalunaarpoq.
Partiimilli nutaanik takorluugai Siumumi parteeqatigisimasaannut unammillersinnaasut qanoq ingerlanersut pillugit oqaaseqartikkuminaappoq.
Pilersaarutit malillugit ingerlasoq
AG sapaatit akunnerani qaangiuttumi partiiliariniagaa pillugu oqaloqatiginiarlugu kimigiisertuaraluarpoq. Oqaloqateqarnissaminulli piffissaqannginnerartarpoq imaluunniit oqarasuaat tigunagu. Sivikitsumilli oqaloqatiginerani oqaasialuit iluatsippavut:
- Suliaq pilersaarutit malillugit ingerlavoq. Napparsimanerali peqqutigalugu saqqumilaarniarsimanngilanga. Tunngaviuatigut piareersagassaqarpoq suliarisariaqakkanik, tamakkulu piffissamik atuiffiusariaqarput, oqarpoq nangillunilu naalakkersuinikkut maannakkut oqaluuserisat pillugit ukiortaami oqaaseqaatissani isummersuutissanilu sulissutigalugit.
Partiinut pioreersunut naaggaartoq
Juulli sioqqullugu Demokraatiniit ilaasortaajunnaartup Michael Rosingip aamma nalunaarutigaa partiimik talerperliuniamik pilersitsilersaarluni. AG-mit paasivarput kingorna Atassummit saaffigineqarsimasoq tassani ilaasortanngortinniarlugu, taamaaliornermikkummi Atassutikkormiut atsiornermik katersisariaqanngilaq.
Rosingilli tusatsiagaq taamaattoq oqaaseqarfiginianngilaa, erseqqissarluguli partiinut pioreersunut ilanngunnissaminik pilersaaruteqarani.
Allaaserisaq AG aviisimi aqagu saqqummertussami tamakkerlugu atuarsinnaavat. Aviisilu uani pisiassaalereerpoq: